बैतडी–बैतडीको सुर्नया गाउँपालिका र पाटन नगरपालिका प्रमुख प्रशासकीय अधिकृत विहिन भएका छन् ।
सुर्नया गाउँपालिकाका प्रमुख प्रशासकीय अधिकृत हर्षबहादुर रोकाको डडेल्धुराको भागेश्वर गाउँपालिकामा सरुवा भएको छ भने पाटन नगरपालिकाका प्रमुख प्रशासकीय अधिकृत गणेशसिंह ऐरीको थप जिम्मेवारी रद्ध गरिएको छ ।
ऐरीलाई संघीय मामिला तथा सामान्य प्रशासन मन्त्रालयले गएको वैशाख १३ मा जिल्ला समन्वय समितिमा दरबन्दी रहने गरेर पाटन नगरपालिकाको प्रमुख प्रशासकीय अधिकृतको समेत थप जिम्मेवारी दिएको थियो ।
मन्त्रालयले भदौ ११ गते ऐरीलाई दिएको थप जिम्मेवारी रद्ध गरेपछि पाटन नगरपालिका प्रमुख प्रशासकीय अधिकृत विहिन भएको हो ।
सुर्नया गाउँपालिकाका प्रमुख प्रशासकीय अधिकृत रोकालाई गएको फागुन ९ गते संघीय मामिला तथा समान्य प्रशासन मन्त्रालयले सुर्नया गाउँपालिकाको प्रमुख प्रशासकीय अधिकृत पदमा खटाएको थियो ।
गाउँपालिकामा झण्डै ५ महिना काम गरेका रोकाको सरुवा भएपछि उनी गएको बिहीबार रमाना लिएर गइसकेका छन् । मन्त्रालयले उनलाई भदौ ७ गते सरुवा गरेको हो ।
रोकाको सरुवा भएसंगै सुर्नया गाउँपालिका पनि प्रमुख प्रशासकीय अधिकृत विहिन भएको छ । स्थानीय तहहरुमा प्रमुख प्रशासकीय अधिकृत धेरै समय नटिक्दा समस्या हुने गरेको छ ।
तत्कालका लागि पाटन नगरपालिका र सुर्नया गाउँपालिकामा आर्थिक तथा प्रशासनिक कामहरु प्रभावित भएका छन् । दुवै पालिकामा नयाँ प्रमुख प्रशासकीय अधिकृत को आउने भन्ने टुंगो लागेको छैन् ।
