बैतडी–रोजगारीका लागि मलेसिया गएका बैतडीका मानबहादुर बिष्टको उतै मृत्यु भएपछि उनको शव नेपाल ल्याएर आज अन्तेष्टी गरिएको छ । उनको सुर्नया गाउँपालिका ३ स्थित वासुलिङ्ग आर्यघाटमा अन्तेष्टी गरिएको सुर्नया गाउँपालिका वडा नं २ का वडा अध्यक्ष गणेश बिष्टले बताए ।
सुर्नया गाउँपालिका २ ग्वानीका ४५ बर्षीय बिष्टको यही साउन २५ गते मलेसियामा मृत्यु भएको थियो । मलेसियाको अजम अर्मला सेक्युरीटी कम्पनीमा १० बर्ष पहिलादेखि काम गर्दै आएका बिष्टले पछिल्लो समय १८ महिना अघि मलेसिया पुगेका थिए ।
साउन २५ गते शुक्रबार साँझ काम सकेर कोठामा आएका मानबहादुर एक्कासी स्वास्थ्यमा समस्या आएको र सोही दिन मृत्यु भएको थियो ।
रोजगारीका लागि मलेसिया गएका बिष्ट उतै अस्ताएपछि प्रक्रिया पूरा गरेर उनको शव नेपाल ल्याएर अन्तेष्टी गरिएको सुर्नया गाउँपालिका वडा नं २ का वडा अध्यक्ष बिष्टले बताए । मृतक बिष्टका घरमा श्रीमती, दुई छोरी र एक छोरा रहेका छन् ।
घरपरिवार चलाउन विदेश पुगेका बिष्ट उतै अस्ताएपछि परिवारमा ठूलो संकट आएको वडा अध्यक्ष बिष्टले बताए । घरको साहरा ढलेपछि उनकी श्रीमती र छोराछोरीको विचल्ली भएको छ ।
चाडपर्वको मुखमा बिष्टको मृत्यु भएपछि अहिले सिंगो ग्वानी गाउँ शोकमा डुबेको वडा अध्यक्ष बिष्टले बताए ।
