बैतडी–बैतडीसहित सुदूरपश्चिमका तीन पहाडी जिल्लामा विद्युत सेवा अवरुद्ध भएको छ । बैतडी, दार्चुला र बझाङमा विद्युत सेवा पूर्ण रुपमा अवरुद्ध भएको नेपाल विद्युत प्राधिकरण बैतडी वितरण केन्द्रका प्रमुख जनार्दन पौडेलले बताए ।
डडेल्धुराको भालुमारेमा १३२ केभी लाइनमा रुख ढलेकाले आइतबार दिउँसोदेखि विद्युत सेवा अवरुद्ध भएको हो । लाइनमा ढलेको रुख हटाउन समय लाग्ने भएकाले आजै विद्युत सेवा सुचारु हुने सम्भावना कम रहेको पौडेलले बताए ।
अत्तरीयाबाट आएको अर्को ग्रीडमा समेत समस्या आएकाले विद्युत सेवा पूर्ण रुपमा अवरुद्ध भएको बताइएको छ । विद्युत सेवा अवरुद्ध भएपछि हजारौं ग्राहक समस्यामा परेका छन् ।
१३२ केभीका दुई ग्रीडमै समस्या रहेको र एकमा पनि समस्या समाधान भएमा विद्युत सेवा सुचारु गर्न सकिने पौडेलले बताए । दुवै ग्रीडमा देखिएको समस्या समाधान नभएमा आज विद्युत सेवा अवरुद्ध नै रहने उनले बताए ।
