बैतडी–लगातारको बर्षाले बैतडीसहित सुदूरपश्चिमका जिल्लाहरुमा जनजीवन प्रभावित भएको छ । तीनदेखि भइरहेको बर्षाका कारण ठाउँठाउँमा ग्रामीण सडकहरु अवरुद्ध भएका छन् । सडकहरुमा पहिरो खसेपछि अवरुद्ध बनेका हुन् ।
लगातारको बर्षापछि सेती नदीमा पानीको बहाव बढेकाले सिगास गाउँपालिका वडा नं ५ ढुंगाडका करीब ६० घरपरिवार नजिकैको शारदा माविमा आश्रय लिएर बसीरहेका छन् । उनीहरुको अस्थायी बसोबासको व्यवस्थापन गर्नका लागि आवश्यक सामग्री पठाउन सिगास गाउँपालिकालाई आग्रह गरिसकेको प्रमुख जिल्ला अधिकारी भीमकान्त शर्माले बताए ।
यस्तै लगातार बर्षा भइरहेकाले साना तथा ठूला नदीहरुमा पानीको बहाव बढ्न सक्ने भएकाले सतर्कता अपनाउन जिल्ला प्रशासन कार्यालयले आग्रह गरेको छ ।
विपद्का घटना हुन सक्ने भएकाले जिल्लास्थित सबै सरकारी तथा गैरसरकारी निकायहरुलाई तयारी अवस्थामा रहन आग्रह गरिएको प्रमुख जिल्ला अधिकारी शर्माले बताए ।
पहिरोका कारण जयपृथ्वी राजमार्ग बेलाबेलामा अवरुद्ध भइरहेकाले सडक डिभिजन कार्यालयको जेसीबी खोड्पे क्षेत्रमा स्टेण्डबाइ राखिएको उनले बताए ।
