बैतडी–बैतडीको पाटन नगरपालिका –६ घर भएका ट्रक चालक बिरभान बिष्टको हत्या प्रकरणमा पक्राउ परेका पाँचै जनामाथि अदालतबाट दोश्रो पटक म्याद थपेर अनुसन्धान भइरहेको छ ।
अदालतले पहिलो पटक दिएको म्याद सकिएपछि आइतबार दोश्रो पटक पाँच दिनका लागि म्याद थपिएको जिल्ला प्रहरी कार्यालय बैतडीका प्रवक्ता प्रहरी निरीक्षक बलराम पाण्डेले जानकारी दिए । मृतकका आफन्तले दिएको किटानी जाहेरीका आधारमा पाँच जनालाई पक्राउ गरिएको र उनीहरुमाथि अनुसन्धान जारी रहेको प्रहरी निरीक्षक पाण्डेले बताए ।
बिरभानको हत्यामा संलग्न रहेको आरोपमा पाटन नगरपालिका ६ की ३६ बर्षीया शिक्षिका भागरथी बिष्ट, पाटन ६ कै ३८ बर्षीय भरतमोहन बिष्ट, पाटन १ का १९ बर्षीय राजेन्द्र भट्टराई, १७ बर्षीय किशोर भट्टराई र पाटन –६का आशिष पहरीमाथि अनुसन्धान जारी रहेको प्रहरीले जनाएको छ ।
असार १ गते शनिबार राति बिरभानको हत्या भएको थियो । असार ३ गते बिष्टको शव घाङल खोलामा फेला परेको थियो ।
