कैलाली –सुदूरपश्चिममा मन्त्रीको विषयलाई लिएर नकेपा माओवादी पार्टीभित्र विवाद सुरु भएको छ ।
माओवादीबाट सुदूरपश्चिम सरकारमा मन्त्री बन्नेहरुबारे पार्टीभित्रै विवाद सुरु भएको हो । संसदीय दलभित्र कुनै सल्लाह नगरेर मन्त्री सिफारिस गरेको भन्दै तत्काल मन्त्री नियुक्त नगर्न पाँच सांसदले मुख्यमन्त्री दीर्घबहादुर सोडारीलाई ध्यानाकर्षण पत्र बुझाएका छन् ।
माओवादीबाट ओमविक्रम भाट ‘सरल’, अक्कल रावल र लक्ष्मी विकको नाम सिफारिस गरिएको छ ।
माओवादीबाट निर्वाचित सांसद खगराज भट्ट, झपट साउद, शिवसिंह ओली, रमेश धामी र जानकी कुँवर पौडेलले संयुक्तरूपमा ध्यानाकर्षण बुझाएका हुन् ।
आज बिहान ११ बजे दलको बैठक आह्वान गरेर मन्त्री सिफारिस गर्ने सल्लाह भएको तर दलको बैठक स्थगित गरेर मन्त्रीको नाम दिएको उनीहरुको दाबी छ । सुदूरपश्चिममा माओवादीका सभामुखसहित ११ सांसद रहेका छन् ।
