बैतडी–बैतडीमा खाद्य स्वच्छता तथा गुणस्तरका बिषयमा बालबालिकाहरुसंग अन्तरक्रिया गरिएको छ । खाद्य प्रविधि तथा गुण नियन्त्रण डिभिजन कार्यालय बैतडीको आयोजनामा दशरथचन्द नगरपालिका ५ स्थित दशरथचन्द मावि सुन्दरखालीमा बालबालिकाहरुसंग अन्तरक्रिया गरिएको हो ।
सोमबार विद्यालयका बालबालिकाहरुसंग खाद्य स्वच्छता र गुणस्तरका बिषयमा अन्तरक्रिया गरिएको खाद्य प्रविधि तथा गुण नियन्त्रण डिभिजन कार्यालय बैतडीका प्रमुख ललित कठायतले बताए ।
खाद्य वस्तुहरुको प्रयोग, गुणस्तर र यसको स्वच्छताका लागि ध्यान दिनुपर्ने कुराहरुको बारेमा बालबालिकाहरुलाई जानकारी गराइएको कठायतले बताए ।
बालबालिकाहरुका माध्यमबाट खाद्य स्वच्छताका बिषयमा घरपरिवारका सदस्यहरुलाई समेत जानकारी होस भन्ने उद्देश्यले अन्तरक्रियाको आयोजना गरिएको बताइएको छ ।
अन्तरक्रियाबाट विद्यालयका विद्यार्थीहरुलाई खाद्य स्वच्छता र गुणस्तरका बिषयमा जानकारी प्राप्त भएको विद्यालयका प्रधानाध्यापक नरेन्द्रबहादुर चन्दले बताए ।
