बैतडी- बैतडीको  सिगास गाउँपालिका  वडा नं १ को कार्यालयमा पुनः तालाबन्दी गरिएको छ । दुदिलाखान–गाँजरी–कुर्चेनेटा सडक संघर्ष समितिले गत आइतबार वडा कार्यालयमा ताला लगाएका थिए ।

उक्त ताला बन्दी बुधवार  दिउँसो वडा अध्यक्ष रामचन्द्र  ऐर लगायतका वडाका जनप्रतिनिधि र इलाका प्रहरी कार्यलय  पाटनका प्रहरी निरीक्षक सरोज कुमार ठकुराठीको रोहोबरमा  खुलेको  थियो। तर  केहि घण्टा नबित्दै  फेरी वडा कार्यालयमा तालाबन्दी गरिएको छ  । आफु संग कुनै छलफल र  संवाद बिना ताला खोलिएको प्रति आपत्ती जनाउदै संघर्ष समितिले वडा कार्यालयमा पुनः तालाबन्दी गरेका हुन् ।

  सिगास गाउँपालिकाको केन्द्र जोड्ने सडक निर्माणका बिषयमा ठोस पहल नभएको भन्दै स्थानीयहरु आन्दोलति छन् । सडक निर्माणका बिषयमा कुनै ठोस पहल नभएकाले फेरि  वडा कार्यालयमा ताला लगाउन बाध्य भएका  संघर्ष समिति संयोजक पवन चन्दले बताए । वडा अध्यक्षले पावर र पहँुच देखाएर विना छलफल ताला तोडेपछि पुनः ताला लगाइएको  उनले  बताए ।

संघर्ष समिति संग कुनै  छलफल नगरि ताला खोलिएको प्रति आक्रोस व्यक्त गर्दै  आन्दोलनकारीहरुले अझ सशक्त आन्दोलन गर्ने  चेतावनी दिएका छन् ।  बाटोको  माग सम्बोधन नहुँदा सम्म आन्दोलन जारी रहने  उनिहरुको  भनाई  छ । वडाका जनप्रतिनिधि र इलाका प्रहरी कार्यलय  बैतडीका प्रहरी निरीक्षक सरोज कुमार ठकुराठीको रोहोबरमा  दिउंसो ताला खोलिएको  र पछि गरिएको  तालाबन्दी बारे जानकारी प्राप्त नभएको  जिल्ला प्रहरी कार्यालय  बैतडीका  प्रवक्ता नन्द राज जोशीले  जानकारी दिए ।