बैतडी –बैतडीको पुर्चौंडी नगरपालिकास्तरीय राष्ट्रपति रनिङ शिल्ड डिलेश्वरी नमुना माध्यमिक विद्यालयले हात पारेको छ ।
डिलेश्वरी माध्यमिक विद्यालयले ११ स्वर्ण,४ रजत र ४ कास्यसहित १९ पदक जितेर प्रथम स्थान हासिल गरेको हो ।
यस्तै प्रतियोगितामामा मालिका माध्यमिक विद्यालय भटनाले ४ स्वर्ण, ५ रजत र ३ कास्य पदक जितेर दोश्रो भएको छ भने भूमिराज माध्यमिक विद्यालय कुवाकोटले ३ स्वर्ण, १ रजत र ४ कास्य पदक हात पारेर तेश्रो भएको छ ।
यही पौष १८ गतेदेखि शुरु भएको प्रतियोगितामा नगरपालिकाभरीका १८ ओटा माध्यमिक विद्यालयहरुको सहभागिता रहेको थियो ।
शनिबार समापन समारोहसहित नगरस्तरीय राष्ट्रपति रनिङ शिल्ड प्रतियोगिता सम्पन्न भएको हो । पुर्चौंडी नगरपालिका वडा नं –१ का वडा अध्यक्ष गणेशबहादुर गडालको अध्यक्षतामा भएको समापन समारोहमा नगर प्रमुख दिपकबहादुर बम प्रमुख अतिथी रहेका थिए ।
विजेता खेलाडी र विद्यार्थीहरुलाई वडा अध्यक्ष गडाल, नगर प्रमुख बम लगायतका व्यक्तिहरुले शिल्ड र प्रमाणपत्र प्रदान गरेका थिए ।
नगरस्तरीय प्रतियोगिताबाट जिल्लास्तरीय राष्ट्रपति रनिङ शिल्डका लागि नगरपालिकाको टीम तयार हुने पुर्चौंडी नगरपालिकाले जनाएको छ ।
