बैतडी–बैतडीको पुर्चौंडी नगरपालिकाले नगरपालिकास्तरीय राष्ट्रपति रनिङ शिल्ड प्रतियोगिता यही पौष १८ गतेदेखि सञ्चालन गर्ने भएको छ । नगरपालिकाको वडा नं १ हाटस्थित कमल–विशाल पार्कमा प्रतियोगिता सञ्चालन गर्ने तयारी भएको नगरपालिकाका प्रमुख प्रशासकीय अधिकृत विनोदकुमार कुँवरले बताए ।
प्रतियोगितामा नगरपालिकाभरीका १८ ओटा माध्यमिक विद्यालयहरुको सहभागिता रहने बताइएको छ । नगरस्तरीय राष्ट्रपति राष्ट्रपति रनिङ शिल्ड प्रतियोगिताबाट जिल्लास्तरीय प्रतियोगिताका लागि नगरको टीम तयार पारिने प्रमुख प्रशासकीय अधिकृत कुँवरले बताए ।
प्रतियोगितामा सहभागी हुने विद्यालयहरुलाई नगरपालिकाबाट २० हजारका दरले व्यवस्थापन खर्च उपलब्ध गराइने समेत प्रमुख प्रशासकीय अधिकृत कुँवरले बताए ।
प्रतियोगिता अन्तर्गत भलिबल, कबड्डी, एथलेटिक्सका खेलहरु सञ्चालन हुने बताइएको छ । प्रतियोगितामा सहभागी हुने विद्यालयहरुलाई पौष १७ गतेभित्र नगरपालिकाको शिक्षा तथा खेलकुद शाखामा नाम दर्ता गरिसक्न आग्रह गरिएको छ ।
नगरपालिकाले खेलकुद क्षेत्रलाई प्राथमिकतामा राखेको नगर प्रमुख दीपकबहादुर बमले बताए । नगरस्तरीय राष्ट्रपति रनिङ शिल्ड प्रतियोगिताले स्थानीयस्तरमा रहेका खेलाडीहरुको क्षमता अभिवृद्धि र नयाँ खेलाडी उत्पादनमा सहयोग मिल्ने उनले बताए ।
