बैतडी –प्रधानमन्त्री कप महिला टी–२० राष्ट्रिय क्रिकेट प्रतियोगिताको सुदूरपश्चिम प्रदेशस्तरीय छनौटमा तेस्रो जित निकाल्दै बैतडी फाइनल नजिक पुगेको छ । बुधबार सम्पन्न खेलमा डडेल्धुरालाई ३२ रनले पराजित गर्दै बैतडी फाइनल नजिक पुगेको हो ।
बैतडीले दिएको १२० रनको लक्ष्य पछ्याएको डडेल्धुरा १९ ओभरमा ८७ रनमा समेटियो । उसका कुनै पनि ब्याटरले दोहोरो अंकमा रन जोड्न सकेनन् । बैतडीका निर्मला भण्डारी र आरती बोहराले २÷२ विकेट हात पारे ।
त्यसअघि कैलालीको तेघरीस्थित सैनिक आवासीय महाविद्यालयको खेलमैदान पहिला ब्याटिङ गरेको बैतडी १९.४ ओभरमा ११९ रनमा अलआउट भयो । जसमा ममता बोहराले २१,पिंकी बोहराले १४ रनको योगदान गरिन् । डडेल्धुराका लागि सपना तामाङले ३,रेजिना कुँवर, निर्मला रावल,सविना नेगीले २÷२ विकेट हात पारिन् ।
बैतडीकी ममता बोहरा ओम्यान अफ द म्याच भएकी स्कोरर नरेन्द्रराज भट्टले जानकारी दिए । तीन जित र एक खेलमा हार ब्यहोरेको बैतडी फाइनल नजिक पुगेको छ । डडेल्धुरा भने प्रतियोगिताबाट बाहिरिएको छ ।
प्रदेशस्तरीय छनौट प्रतियोगितामा उत्कृष्ट प्रदर्शन गर्ने खेलाडीको सुदूरपश्चिमको टोली बनाइनेछ । उक्त टोली अगामी पुसमा हुने राष्ट्रिय प्रतियोगितामा सहभागिता जनाउनेछ ।
काठमाडौंमा हुने प्रधानमन्त्री कप महिला टी –२० राष्ट्रिय क्रिकेट प्रतियोगितामा सात प्रदेश र एक विभागीय क्लब एपीएफको सहभागीता रहने नेपाल क्रिकेट संघ क्यानका अध्यक्ष चतुरबहादुर चन्दले जानकारी दिए ।
