बैतडी– बैतडीमा स्थानीय सरकारले सेवाग्राहीबाट महंगो शुल्क लिने गरेको गुनासो बढेको छ । यहाँका स्थानीयतह हरुले विभिन्न सेवा लिँदा महंगो शुल्क लिने गरेका भन्दै नागरिकहरुको गुनासो बढेको हो । जिल्लाको सुर्नया गाउँपालिकाले सेवा ग्राहीबाट लिने शुल्क महंगो भएको युवाहरुको गुनासो छ ।
वडा नं ३ डुंगरी गाउँकी भागरथी ऐरले आफुबाट आय प्रमाणित दस्तुर झण्डै ९ हजार लिएको बताइन् । वडाले मात्रै कागजमा छाप हानेको ८ हजार ७ सय २८ रुपैँया लिएको उनको भनाई छ । सिफारिसमा पनि वडाले ५ सय लिने गरेको छ । यता वडा नं ३ का वडा सचिव लक्ष्मी भट्टले भने पालिकाले बनाएको आर्थिक ऐन अनुसार नै शुल्क लिएको बताइन् । यस्तै वडा नं २ ले पनि सिफारिस दस्तुर ५ सय रुपैँया लिने गरेको छ ।
वडाहरुले यसरि महंगो शुल्क असुल्दा जनता मारमा परेका युवा चन्द्र सिंह ऐरको भनाई छ ।गाउँपालिकाले तोकेको शुल्कले जनता मारमा परेकाले यसमा पुर्नविचार गर्नु पर्नेमा उनले जोड दिए । गरिब जनताको ढाड सेक्ने गरि लिने शुल्क घटाउनु पर्ने उनको भनाई छ ।
एक सिफारिस पत्रमा छाप हानेको ५ देखि ६ सय सम्म लिँदा गरिब जनता समस्यामा परेका युवाहरुको भनाई छ । जनताहरुबाट अनुमोदित जनप्रतिनिधिहरुले जनतालाई सौलियत दिनु पर्नेमा चर्काे शुल्क लिने गरेको भन्दै पालिकाका युवाहरु आक्रोसित छन् । अन्य पालिकाहरुले पनि शुल्क महंगो नै लिने गरेका सेवाग्राहीहरुको गुनासो बढ्दै गएको छ । यता जिल्ला प्रशासन कार्यालय बैतडीका सूचना अधिकारी शंकर बहादुर बोहराले पनि स्थानीय सरकारले लिने शुल्क महंगो भएको गुनासो बढेका बताए ।
आर्थिकको अनुमति स्थानीय सरकारलाई नै भएकाले स्थानीय सरकारले आ आफनै ढंगबाट शुल्क लिने गरेका र त्यो मंहगो भएको भन्न्ने गुनासो जनताबाट प्रशासन सम्म आउने गरेको उनको भनाई छ । बैतडीमा स्थानीयतह पिच्छे नै सिफारिस शुल्क फरक देखिएको सूचना अधिकारी बोहराले बताए ।
