बैतडी –बैतडीको दशरथचन्द नगरपालिकामा जारी नगरस्तरीय टि–२० पुरुष क्रिकेट प्रतियोगितामा दनपा २ फाइनलमा प्रवेश गरेको छ । बुड्डाबाजे खेलमैदान रातामाटा जारी प्रतियोगितामा दनपा १० लाई १९ रनले पराजित गर्दै दनपा २ फाइनलमा प्रवेश गरेको हो ।
टस जितेर पहिला ब्याटिङ गरेको दनपा २ ले २० ओभरमा ९ विकेट गुमाउँदै ११२ रन बनायो । उसका लागि कपील बोहराले २३ र करन लावडले २० रनको योगदान गरे ।
बलिङतर्फ दनपा १० का प्रकाश बुडालले तीन विकेट लिए ।
११३ रनको विजयी लक्ष्यका साथ मैदान उत्रेको दनपा १० को टीम १३ ओभरमा ९३ रन बनाउँदै अलआउट भयो । उसका लागि उत्तम चन्दले २५ रनको योगदान गरेपनि हार भने टार्न सकेनन् । यस्तै रोहित बुडालले १२ रन बनाए ।
बलिङतर्फ दनपा २ का सन्तोष बिजलेले ४ विकेट लिए । उनी प्लेयर अफ दि म्याच घोषित भए ।
यसअघि आज बिहान भएको पहिलो सेमीफाइनल खेलमा दनपा ११ लाई २ विकेटले पराजित गर्दै दनपा ४ फाइनलमा पुगिसकेको छ ।
अब बुधबार दनपा २ र दनपा ४ बीच फाइनल भिडन्त हुने अम्पायर महेश भण्डारीले बताए ।
नगर खेलकुद विकास समितिको बार्षिक कार्यतालिका अनुसार दशरथचन्द नगरपालिकाले आयोजना गरेको प्रतियोगितामा ११ ओटै वडाका ११टीमको सहभागिता छ ।
यही कार्तिक २२ गते सम्म सञ्चालन हुने प्रतियोगितामा प्रथम हुने टीमलाई नगद २२ हजार ५ सयसहित ट्रफी, मेडल र प्रमाणपत्र प्रदान गरिनेछ । यस्तै दोश्रो हुने टीमलाई नगद १५ हजारसहित ट्रफी, मेडल र प्रमाणपत्र प्रदान गरिने आयोजकले जनाएको छ ।
यस्तै म्यान अफ दि सिरिजलाई नगद २ हजार २५० सहित ट्रफी, मेडल र प्रमाणपत्र प्रदान गरिनेछ भने बेस्ट बलर र बेस्ट ब्याट्सम्यानलाई समान १ हजार १२५ नगद पुरस्कारसहित ट्रफी, मेडल र प्रमाणपत्र प्रदान गरिने आयोजकले जनाएको छ ।
