बैतडी–बैतडीको दशरथचन्द नगरपालिकामा जारी नगरस्तरीय पुरुष टि–२० क्रिकेट प्रतियोगिता अन्तर्गत दनपा ४ फाइनलमा प्रवेश गरेको छ । बुड्डाबाजे खेलमैदान रातामाटामा आज बिहान भएको सेमीफाइनलमा दनपा ११ लाई २ विकेटले पराजित गर्दै दनपा ४ फाइनलमा प्रवेश गरेको हो ।
टस जितेर पहिला ब्याटिङ गरेको दनपा ११ ले १४.३ ओभरमा अलआउट हुँदै ४५ रन बनायो । उसका लागि किशोर पन्तले १० रनको योगदान गरे ।
बलिङतर्फ दनपा ४ का वसन्त खत्रीले ४ र सन्तोष चन्दले २ विकेट लिए ।
४६ रनको विजयी लक्ष्यका साथ मैदान उत्रेको दनपा ४ ले ८.४ ओभरमा ८ विकेट गुमाउँदै लक्ष्य पूरा गर्यो । उसका लागि राजु भाटले ११ रनको योगदान गरे ।
बलिङतर्फ दनपा ११ का राम चन्दले ४ र प्रेम चन्दले ३ विकेट लिए ।
आजै हुने दोश्रो खेलबाट फाइनलमा पुग्ने अर्को टोलीको टुंगो लाग्नेछ । फाइनलका प्रवेशका लागि दनपा २ र दनपा १० बीच खेल हुने स्कोरर तिलक बोहराले बताए ।
