बैतडी –बैतडीको दशरथचन्द नगरपालिकामा जारी नगरस्तरीय क्रिकेट प्रतियोगिता अन्तर्गत आज दुई खेल सम्पन्न भएका छन् । बुड्डाबाजे खेलमैदान रातामाटामा जारी प्रतियोगितामा आजको खेलमा दनपा ४ र ५ विजयी भएका छन् ।
आज भएको पहिलो खेलमा दनपा ४ ले दनपा १ लाई १२० रनले पराजित गरेको छ । टस जितेर पहिला ब्याटिङ गरेको दनपा ४ ले २० ओभर खेल्दै ७ विकेटको नोक्सानीमा २१५ रन बनायो । दनपा ४ का आकाश चन्द ४७ बलमा ८१ रन र जनक चन्दले ३१ बलमा ६८ रनको योगदान दिए ।
बलिङतर्फ दनपा १ का हेमन्त चन्दले ३ विकेट लिए ।
२१६ रनको विजयी लक्ष्यसहित मैदानमा उत्रेको दनपा १९ ओभरमा अलआउट हुँदै ९५ रनमात्रै बनाउन सक्यो ।उसका लागि महेश भट्टले २८ रनको योगदान गरे ।
बलिङतर्फ दनपा ४ का प्रदीप चन्दले ५ विकेट लिए । उनी म्यान अफ दि म्याच घोषित भए ।
यस्तै आजै भएको दोश्रो खेलमा दनपा ५ ले दनपा ७ लाई ३२ रनले पराजित गरेको छ । टस जितेर पहिला ब्याटिङ गरेको दनपा ५ ले २० ओभर खेल्दै ९ विकेटको नोक्सानीमा १७१ रन बनायो । उसका लागि सुमन रावलले ३७ बलमा ४४ रनको योगदान दिए ।
बलिङतर्फ दनपा ७ का पुष्करराज बडूले ३ विकेट लिए ।
१७२ रनको विजयी लक्ष्यसहित मैदान उत्रेको दनपा ७ ले १६.१ ओभरमा अलआउट हुँदै १३९ रनमात्रै बनाउन सक्यो ।
बलिङतर्फ दनपा ५ का निखिल चन्द र मनिष लुहारले समान ३÷३ विकेट लिए । उक्त खेलमा दनपा ५ का मनिष लुहार म्यान अफ दि म्याच घोषित भए ।
प्रतियोगिता अन्तर्गत भोलि हुने पहिलो खेलमा दनपा ४ र ८ भिड्नेछन् भने दोश्रो खेलमा दनपा ३ र ६ खेल्नेछन् ।
नगर खेलकुद विकास समितिको बार्षिक कार्यतालिका अनुसार दशरथचन्द नगरपालिकाले आयोजना गरेको प्रतियोगितामा ११ ओटै वडाका ११टीमको सहभागिता छ ।
यही कार्तिक २३ गते सम्म सञ्चालन हुने प्रतियोगितामा प्रथम हुने टीमलाई नगद २२ हजार ५ सयसहित ट्रफी, मेडल र प्रमाणपत्र प्रदान गरिनेछ । यस्तै दोश्रो हुने टीमलाई नगद १५ हजारसहित ट्रफी, मेडल र प्रमाणपत्र प्रदान गरिने आयोजकले जनाएको छ ।
यस्तै म्यान अफ दि सिरिजलाई नगद २ हजार २५० सहित ट्रफी, मेडल र प्रमाणपत्र प्रदान गरिनेछ भने बेस्ट बलर र बेस्ट ब्याट्सम्यानलाई समान १ हजार १२५ नगद पुरस्कारसहित ट्रफी, मेडल र प्रमाणपत्र प्रदान गरिने आयोजकले जनाएको छ ।
