बैतडी- बैतडीको सुर्नया गाउँपालिकाले चालु आर्थिक वर्षको प्रथम चौमासिकको सार्वजनिक सुनुवाई कार्यक्रम गर्दै छ । गाउँपालिकाले चालु आर्थिक वर्ष २०८०÷८१ को प्रथम चौमासिकको सार्वजनिक सुनुवाई गर्न लागेको हो ।
गाउँपालिकाले मंगलबार एक सूचना जारी गरेर चालु आर्थिक वर्ष २०८०÷८१ को प्रथम चौमासिक सार्वजनिक सुनुवाई कात्तिक २२ गते हुने जनाएको छ । तर गाउँपालिकाले वडा नं ५ मा रहेको केन्द्र छाडेर सार्वजनिक सुनुवाई कार्यक्रम वडा नं ८ को कार्यालयमा राखेको छ ।
वडा नं ८ को कार्यालय साँफेबगरमा गाउँपालिकाले सार्वजनिक सुनुवाई हुने भनेर सूचना जारी गरेपछि जनस्तरबाट आलोचना भैरहेको छ । वडा नं १, २ , ३ , ४ र ५ का जनताले सार्वजनिक सुनुवाई हुने ठाउँमा पुग्न घण्टौँ सयम लाग्छ भने गाडी भाडा समेत महँगो पर्छ । अन्य वडाका नागरिकहरुलाई पनि सो ठाउँमा जान समस्या नै हुन्छ ।
स्थानीय सरकारले गरेका सेवा प्रवाह तथा विकास निर्माण लगायतका योजनाका बारेमा आम गाउँबासीलाई अवगत गराउने हेतुले सार्वजनिक सुनुवाई गरिन्छ । जनता, जनप्रतिनिधि तथा कर्मचारीहरुबिच दोहोरो संवाद हुने सार्वजनिक सुनुवाई कार्यक्रम गाउँपालिकाले वडा नं ८ मा राख्दा जनसहभागिता न्यून हुने देखिन्छ ।
जनता र जनप्रतिनिधिहरु बिच भैगरेका र अगामि योजनाका बारेमा प्रश्नोत्तरि हुने सार्वजनिक सुनुवाई कार्यक्रम जनताबाट टाढा एकान्त ठाउँमा राख्न खोजेको भन्दै जनप्रतिनिधिहरुको अहिले आलोचना भैरहेको छ । गाउँपालिकाले ढोलेमा कार्यम्रकम राखेर जवाफ देहिताबाट भाग्न खोजेको स्थानीय युवा जयन्त प्रशाद भट्टको आरोप छ।
सबैको पाइक पर्ने ठाउँ केन्द्रमा सार्वजनिक सुनुवाई कार्यक्रम राख्न उनले गाउँपालिकालाई अनुरोध समेत गरेका छन् । यता गाउँपालिकाका अध्यक्ष अम्मर बहादुर कुँवरले माथिल्लो भेगका जनताले अहिले सम्म कार्यक्रममा सहभागिता नजनाएकाले उनिहरुको पनि यस्ता कार्यक्रममा सहभागिता होस भनेर साँफेबगरमा कार्यक्रम राखिएको बताए ।
गाउँपालिकामा सबै संग सल्लाह गरेर प्रथम चौमासिकको सार्वजनिक सुुनुवाई कार्यक्रम राखिएको उनले बताए । यस पछिका सार्वजनिक सुनुवाई कार्यक्रम वडा नं १, २ र ३ का जनतालाई समेट्ने गरेर राखिने अध्यक्ष कुँवरले बताए । अन्तिम चौमासिकको सार्वजनिक सुनुवाई पालिकाको केन्द्रमा गर्ने योजना रहेको समेत अध्यक्ष कुँवरले बताए ।
