बैतडी –बैतडीको पाटनमा जारी तेश्रो संस्करणको पिपिएल क्रिकेट प्रतियोगितामा आज ३ खेल सम्पन्न भएका छन् । आज भएको पहिलो खेलमा टिम क्वालीटी कैलपालले दशरथचन्द स्मृति प्रष्ठिानलाई हराएको छ । 

टस जितेर पहिला ब्याटिङ गरेको कैलपालले निर्धारित १५ ओभरको समाप्तीमा ५ विकेट गुमाएर १८२ रन बनाएको थियो । १८३ रनको लक्षसहित मैदान उत्रेको प्रतिष्ठानले १५ ओभरमा ७ विकेट गुमाएर १४४ रन मात्रै बनाउन सक्यो । सो खेलमा कैलपालका प्रदिप म्यान आफ द म्याच चुनिए । कैलपालको यो लगातार दोश्रो जित हो । 

आजै भएको दोश्रो खेलमा सहस्त्रलिङ्ग क्रिकेट क्लबलाई भुमेश्वर क्रिकेट क्लबले हराएको छ । टस जितेर ब्याटिङ थालेको सहस्त्रलिंगले १४ दशमलव ३ओभरमा ८७ रन बनाएर अलआउट भयो । 

८८ रनको विजय लक्ष्यका साथ मैदान उत्रेको भुमेश्वरले ६ दशमलव २ ओभरमा नै लक्ष भेट्टायो । भुमेश्वरका केशव टेरले ४५ रन बनाए । उनी म्यान अफ द म्याच चुनिए । 

यसैगरी आजै भएको अन्तिम खेलमा मेलौलीले ग्वाल्लेक क्रिकेट क्लबलाई हराएको छ । टस जितेर ब्याटिङ गरेको ग्वाल्लेकले निर्धारित १५ ओभरमा ८ विकेट गुमाएर १११ रन बनायो । ११२ रनको विजयी लक्षका साथ मैदान उत्रेको मेलौलीले ११ ओभरमा ४ विकेट गुमाएर लक्ष्य भेट्टायो । टिमका लागि २४ रन हिर्काएर एक विकेट समेत लिएका सुनिल क्षेत्री म्यान अफ द म्याच चुनिए ।