बैतडी –बैतडीमा आगामी मंसिर १६ गतेदेखि बिडिसिए कप क्रिकेट प्रतियोगिता हुने भएको छ । बैतडी जिल्ला क्रिकेट संघको आयोजनामा बिडिसिए कप हुन लागेको हो ।
संघले जिल्लामा रहेका १३ ओटा क्रियाशील क्रिकेट क्लबहरुलाई समेट्दै बिडिसिए कप क्रिकेट प्रतियोगिता आयोजनाको तयारी गरेको बैतडी जिल्ला क्रिकेट संघका अध्यक्ष विनोदबहादुर चन्दले बताए ।
जिल्लाको शहीद दशरथचन्द खेलमैदान सुन्दरखाली र पाटन खेलमैदानमा प्रतियोगिता सञ्चालन हुने बताइएको छ । प्रतियोगितामा भाग लिने टीमहरुलाई कार्तिक मसान्तभित्र टीम दर्ता गराइसक्न आग्रह गरिएको छ ।
शहीद दशरथचन्द खेलमैदानमा नागार्जुन क्रिकेट क्लब, कालशैनी क्रिकेट क्लब, त्रिपुरा क्रिकेट क्लब, ग्वाल्लेक क्रिकेट क्लब, प्रतिष्ठान, एनआरवाईसी बठ्ठा र पंचकोटी क्रिकेट क्लबहरुबीच खेल हुने छ ।
त्यसैगरी पाटन खेलमैदानमा निङ्गलासैनी क्रिकेट क्लब, नवजागृति क्रिकेट क्लब, महामाया क्रिकेट क्लब, यौंगस्टार क्रिकेट क्लब, महारुद्र क्रिकेट क्लब र पाटन क्रिकेट क्लबकाबीच खेल हुने आयोजकले जनाइको छ ।
प्रतियोगिता सम्बन्धी कार्यविधि र सहभागिता शुल्कका बिषयमा अर्को सूचनामार्फत जानकारी दिइने बैतडी जिल्ला क्रिकेट संघले जनाएको छ ।
