बैतडी- बैतडीको सुर्नया गाउँपालिकामा वक्तृत्वकला प्रतियोगिता सम्पन्न भएको छ । गाउँपालिकाको आयोजनामा सोमबार मावि स्तरिय वक्तृत्वकला प्रतियोगिता सम्पन्न भएको हो ।
वक्तृत्वकला प्रतियोगितामा सुर्नया गाउँपालिका वडा नं २ स्थित बाशुदेव मावि लिस्किटामा अध्यनरत छात्रा लक्ष्मी टेलर प्रथम भएकी छिन् । यस्तै सुर्नया गाउँपालिका ६ स्थित शंकर संस्कृत मावि मुलखटालीकी छात्रा बिजया अवस्थी द्धितिय भएकी छिन भने सुर्नया ५ मा रहेको रौलेश्वर मावि रामकी बरायलमा अध्यनरत छात्रा सिर्जना विष्ट तृतिय भएकी हुन् ।
यस्तै वडा नं ४ को उदयदेव माविका छात्र राज भट्टले सान्तोवना स्थान हासिल गरेका सुर्नया गाउँपालिकाका शिक्षा शाखा प्रमुख टंक प्रशाद अवस्थीले जानकारी दिए । “सामुदायिक विद्यालयको गुणस्तर उकास्नमा विद्यार्थीको भूमिका”भन्ने शिर्षकमा वक्तृत्वकला प्रतियोगिता गरिएको थियो । सोमबार वक्तृत्वकला प्रतियोगिता गरिएको र अर्काे दिन विशेष कार्यक्रमको आयोजना गरेर नगद पुरस्कार सहित प्रमाणपत्र प्रदान गरिने शिक्षा शाखा प्रमुख अवस्थीले बताए ।
गाउँपालिकाको केन्द्रमा उपाध्यक्ष मञ्जु बोहराको अध्यक्षता तथा अध्यक्ष अम्मर बहादुर कुँवरको प्रमुख आतिथ्यतामा सम्पन्न कार्यक्रममा गाउँपालिकाका कर्मचारी, शिक्षक विद्यार्थी र अभिभावकहरुको उपस्थिति रहेको थियो । सुर्नया गाउँपालिकामा १३ ओटा माध्यमिक विद्यालय छन् ।
प्रतियोगितामा १२ ओटा माविले सहभागिता जनाएका थिए । विद्यार्थीको अन्तर्निहित सिर्जनशीलता प्रस्फुटन गरेर पढाइको गुणस्तरमा सुधार ल्याउन वक्तृत्वकलाको आयोजन गरिएको र अगामी दिनमा पनि यस्ता कार्यक्रम आयोजन गरिने गाउँपालिकाले जनाएको छ ।
