बैतडी- बैतडीको पाटनमा सुपथ मूल्य पसल सञ्चालन गर्न माग गरिएको छ । पाटन नगरपालिकाले खाद्य कम्पनी धनगडी संग पाटन बजारमा सुपथ मुल्य पसल सञ्चालन गर्न माग गरेको हो ।
नगरपालिकाका उप प्रमुख कमल सिंह बोहराले नुन मात्र पाईने साल्ट ट्रेडिङ पाटन शाखामा सहुलियत मुल्यमा अन्य दैनिक उपभोग्य सामग्री पनि उपल्बध गराउन माग गरेका हुन् ।
खाद्य व्यवस्था तथा व्यापार कम्पनी साल्ट ट्रेडिङ कर्पाेरेसन लिमिटेड सुदूरपश्चिम प्रदेश कार्यालय धनगडीलाई पत्राचार गरेर उप प्रमुख बोहराले सुपथ मूल्य पसलका लागि माग गरेका हुन् । चाँडपर्वको अवसरमा सहुलियत पसलमा नुन मात्र रहेकाले अन्य दैनिक उपभोग्य सामग्री उपलब्ध गराउन माग गर्दै पत्र पठाएको उपप्रमुख बोहराको भनाई छ ।
केहि वर्ष यता बैतडीमा चाडपर्वका बेला सुपथ मूल्य पसल सञ्चालन नहुँदा उपभोक्ता मारमा परेका छन् । सुपथ मूल्यमा सहुलियत दरमा खाद्य सामग्री उपलब्ध हुने भएपनि सञ्चालनमा नआउँदा समस्या हुने गरेको छ । सुपथ मूल्य पसल सञ्चालन भए नागरिकहरुले बाहिर बजारको भन्दा सहुलियत मूल्यमा खाद्य सामग्री किन्न पाउने छन् ।
