बैतडी –पूर्वाधार विकास कार्यालय बैतडीका प्रमुख जगतप्रसाद जोशीले सडक डिभिजन कार्यालयबाट आफूहरुलाई लेन्थवर्कर हस्तान्तरण नगरिएको बताएका छन् । सडक डिभिजन कार्यालयले सडकहरु हस्तान्तरण गर्दा पाटन –पञ्चेश्वर सडकका लेन्थवर्कर हस्तान्तरणका बारेमा कुनै कुरा उल्लेख नगरेको बताए । उनले भने ‘ सडक कार्यालयले २०७५ मा लेन्थवर्कर तथा सुपरभाईजर काम गरिरहेका भन्ने जानकारी गराएको भएपनि त्यो जानकारी पछि सडकले नै उनीहरुलाई तलब खुवाएको छ ।’
कानुनी हिसाबले आफूहरुले लेन्थवर्कर सडकमा राख्न नपाइने समेत उनले दाबी गरे । उनले भने ‘हामीलाई ठेक्का भएको सडक हस्तान्तरण भएको हो । ठेक्का भएको सडक ठेकेदार मातहत हुन्छ । त्यसैले अहिले हामीले लेन्थवर्कर राख्न मिल्दैन् ।’
आफूहरुलाई सडक डिभिजन कार्यालयले लेन्थवर्करहरुको नामावली दिएकाले त्यो बिषयमा बुझ्न सडक बोर्ड सम्म पुगेपनि पूर्वाधार विकास कार्यालयमा उनीहरु तलब निकासा नभएको जोशीले बताए ।
यस्तै लेन्थवर्करहरुले उठाएको मागको बिषयमा २०७६ असोजमै भौतिक पूर्वाधार विकास मन्त्रालयमा फाइल बुझाएको भएपनि अहिले सम्म कुनै सुनुवाई नभएको जोशीले बताए ।
पाटन–पञ्चेश्वर सडकमा काम गर्ने लेन्थवर्करहरुले आफूहरुले नियमित काम गर्दै आईरहेको दाबी गरेका छन् । तर पूर्वाधार विकास कार्यालयले भने कसैलाई काममा नलगाएको प्रष्ट पारेको छ ।
२१ महिनादेखि पारिश्रमिक नपाएको भन्दै गएको शुक्रबारदेखि १२ जना लेन्थवर्कर अनसनमा बसीरहेका छन् । आफ्ना मागहरु पूरा नहुँदा सम्म उनीहरुले अनसन नछाड्ने अडान लिएका छन् ।
