बैतडी- भारतसंग सीमा जोडिएको बैतडीको सीमानाका झुलाघाटमा भिड बढेको छ । गौरा पर्व नजिकिए संगै आजभोलि आउजाउ गर्नेको सीमामा भिड बढेको हो ।
गौरा मनाउ घर फर्किने प्रदेशी र गौराका लागि सामान किन्नेहरुको संखयामा वृद्धि भएपछि सीमामा भिड बढेको सीमा प्रहरीचौकी झुलाघाटका प्रहरी इन्चार्ज प्रहरी सहायक निरीक्षक जयसिंह भाट जानकारी दिए । नौकरी गरेर नेपाल फर्किने र यताबाट खाद्यान्न सामान खरिदका लागि जाने बढेका उनले बताए ।
अहिले झुलाघाट नाकाबाट दैनिक डेढसय जना आउजाउ गरिरहेका उनको भनाई छ । लत्ता कपडा, खाद्यान्न लगायतका सामानका लागि जानेको सङख्यामा पनि पहिले भन्दा अहिले वृद्धि भएको उनले बताए । सुदूरपश्चिमेलीहरुको महान पर्व गौरा नजिक आएपछि सीमामा पनि चहलपहल बढेको छ ।
गौरा पर्वका बेला खाद्यान्न लत्ताकपडा लगायत सामान किन्न यहाँका अधिकाँश नागरिकहरु भारतीय बजार जाने गरेका छन् । सीमा नाका झुलाघाटबाट स्वदेश भित्रिने र सामानका लागि जानेको सङख्या बढेपछि चेकजाँचमा पनि कडाइ गरिएको छ ।
अैवध सामान नभित्रियोस भनेर चेकजाँच गर्ने गरिएको झुलाघाट प्रहरीचौकीका इञ्चार्ज प्रहरी सहायक निरीक्षक भाटले बताए । गौरा नजिकिएसंगै गाउँघरमा चहलपहल बढेको छ । यो बर्ष कुनै ठाउँमा भदौ ७ गते र कुनै ठाउँमा भदौ २१ गते गौरा मनाइदै छ ।
