बैतडी –बैतडीको एक सामुदायिक वनमा जथाभावी रुख काटेर वन फडानी गरेको आरोप लागेको छ । नेपाल राष्ट्रिय मावि ग्वानीको भवन निर्माणका लागि सुर्नया गाउँपालिका २ स्थित सिद्धनाथ सामुदायिक वनबाट रातीको समयमा जथाभावी रुख काटेको आरोप लागेको हो । सामुदायिक वनको हाताभित्र करीब २ सय रुख काटिएको स्थानीयहरुले आरोप लगाएका छन् । सामुदायिक वन भित्रको काठ काट्दा सामुदायिक वन उपभोक्ता समितिको अनुमति लिएर समितिको कार्ययोजना र विधान अनुसार काठ काट्नुपर्ने भएपनि त्यसो भने गरिएको छैन् । 

सामुदायिक वनको हाताभित्र काठ काटिएको बिषयमा आफूहरुलाई उपभोक्ताहरुबाट गुनासो आएको कति काठ काटेको भन्ने बिषयमा यकिन नभएको सिद्धनाथ सामुदायिक वन उपभोक्ता समितिका सचिव मोहनबहादुर बिष्टले बताए । आफूहरुलाई काठ काटेको बिषयमा गुनासो आएपछि निर्माण समितिलाई पत्र काटेको समेत उनले सुनाए । 

विद्यालय भवन निर्माणको जिम्मा लिएका डम्मरबहादुर बिष्टले भने आफूहरुले विद्यालय व्यवस्थापन समितिबाट निर्णय गरेर सामुदायिक वन उपभोक्ता समितिमा पत्र पठाएको भएपनि कुुनै सुनुवाई नभएपछि अपुग भएको कुकाठका रुखहरु काटेको बताए । आफूहरुले विद्यालय सार्वजनिक सम्पत्ति भएकाले ६० जति कुकाठका रुख काटेर प्रयोग गरेको उनले बताए । उनले भने ‘हामीले विद्यालय भवन निर्माणका लागि काठ काटेका हौं । तर विद्यालय भवन निर्माण हुन नदिने तत्वले बखेडा झिकेको हो ।’

रातीको समयमा सामुदायिक वनबाट काठ किन ल्याएको हो भन्ने प्रश्नमा आफूहरुलाई काठ उपलब्ध नगराउने भएपछि रातीको समयमा ल्याएको बिष्टले बताए । 

तर यो बिषयमा डिभिजन वन कार्यालयका प्रमुख केशव पराजुलीले सामुदायिक वनको संरक्षण, सम्वद्र्धन र उपयोग गर्ने सामुदायिक वन उपभोक्ता समितिमा रहेकाले पहिला समितिले नै यो बिषयमा आवश्यक कारवाही गर्नुपर्ने बताए । सामुदायिक वन उपभोक्ता समितिको निर्णय अटेर गरे मात्रै फाइल सहित डिभिजन वन कार्यालयमा समितिले उजुरी दिनुपर्ने उनले बताए ।