बैतडी –बीमा भरेमा अनुदान दिन्छु भन्दै ठगी गर्ने एकजनालाई बैतडी प्रहरीले नियन्त्रणमा लिएको छ । जिल्लाको पाटन नगरपालिका वडा नं २ सिलंगाका ३४ बर्षीय कमलराम विकलाई नियन्त्रणमा लिइएको इलाका प्रहरी कार्यालय पाटनका प्रमुख प्रहरी निरीक्षक राजेश शाहीले जानकारी दिए । उनले भने ‘स्थानीय नागरिकहरुले दिएको जाहेरीको आधारमा हामीले विकलाई नियन्त्रणमा लिएका छौं । उनीमाथि अनुसन्धान गरिरहेका छौं ।’
विकले सिटिजन लाइफ इन्स्योरेन्समा बीमा भरिदिन्छु भन्दै स्थानीयहरुबाट रकम संकलन गरेर ठगि गरेको पाइएको प्रहरी निरीक्षक शाहीले बताए ।
महेन्द्रनगरबाट २५ लाख र बैतडीबाट १५ देखि २० लाख रकम संकलन गरेर स्थानीयहरुलाई विकले ठगेको प्रारम्भिक अनुसन्धानले देखाएको छ ।
स्थानीयहरुले इलाका प्रहरी कार्यालयमा जाहेरी दिएपछि विकलाई नियन्त्रणमा लिएको र बिहीबार उनी विरुद्ध मुद्दा दायर हुने प्रहरी निरीक्षक शाहीले बताए ।
कमलराम विकसंगै दुईजना अरु पनि ठगी कार्यमा संलग्न रहेको बुझिएको र खोजी कार्य जारी रहेको प्रहरीले जनाएको छ ।
