बैतडी –कोरोना महामारीको दोश्रो लहर फैलिएपछि बैतडीमा पहिलो पटक आज कोरोना संक्रमण पुष्टि हुनेको संख्या शुन्यमा झरेको छ । ४४९ जनाको कोरोना परीक्षण गर्दा सबैको रिपोट नेगेटिभ आएको स्वास्थ्य कार्यालयका सीआइसीटी सहजकर्ता बिनिता चौधरीले बताइन् ।
एकजनाको पीसीआर परीक्षण र ४४८ जनाको एन्टीजेन परीक्षण गर्दा सबैको रिपोट नेगेटिभ आएको उनले बताइन् । यस्तै आज २६ जनाले कोरोना जितेका छन् । जिल्लाका विभिन्न स्थानीय तहमा रहेका संक्रमित मध्ये २६ जनाले कोरोना जितेको चौधरीले बताइन् ।
अहिले जिल्लामा सक्रिय संक्रमितको संख्या १४० रहेको छ । सुर्नया गाउँपालिकामा ४२ जना, मेलौली नगरपालिकामा २३ जना, दशरथचन्द नगरपालिकामा २१ जना, पञ्चेश्वर गाउँपालिकामा १३ जना र पाटन नगरपालिकामा ११ जना सक्रिय संक्रमित रहेका छन् ।
यस्तै पुर्चौंडी नगरपालिकामा ११ जना, दोगडाकेदार गाउँपालिकामा १० जना, शिवनाथ गाउँपालिकामा ३ जना, सिगास गाउँपालिकामा ३ जना र डिलाशैनी गाउँपालिकामा १ जना सक्रिय संक्रमित रहेका छन् । बैतडीमा अन्य ठाउँका २ जना सक्रिय संक्रमित रहेका स्वास्थ्य कार्यालयले जनाएको छ ।
