बैतडी–बैतडी जिल्लामा विभिन्न खानी र उद्योग सञ्चालनको माग गर्दै प्रमुख जिल्ला अधिकारीमार्फत प्रधानमन्त्रीलाई ध्यानाकर्षण पत्र पठाइएको छ ।
बुधबार बैतडी उद्योग वाणिज्य संघका उपाध्यक्षसहित युवाहरुको समूहले प्रमुख जिल्ला अधिकारी डा. डिजन भट्टराईमार्फत ध्यानाकर्षण पत्र बुझाएका हुन् ।
बैतडीमा विभिन्न खानी र उद्योगहरुको सम्भावना रहेको भएपनि खानी उत्खनन र उद्योग सञ्चालनका लागि पहल नभएकाले प्रधानमन्त्री बालेन्द्र शाहलाई ध्यानाकर्षण पत्र पठाएको सामाजिक अभियान्ता महेशदत्त भट्टले बताए ।
बैतडीको दोगडाकेदार र सुर्नया गाउँपालिकाको सिमानामा आइएमइ ग्रुपले ३० अर्बको लगानिमा सिमेन्ट उद्योग सञ्चालनको तयारी गरेको भएपनि सरकारी निकायकै उदासीनताका कारण उद्योग सञ्चालन हुन नसकेको ध्यानाकर्षण पत्रमा उल्लेख गरिएको छ । २०७८ सालमा विस्तृत अध्ययनपछि खानी सञ्चालनको तयारी भएको थियो ।
यस्तै पुर्चौंडी नगरपालिका–८ मा फलाम खानी उत्खननका लागि २०७१ र २०८१ सालमा गरी दुई पटक अध्ययन भएको तर खानी सञ्चालनका बिषयमा विस्तृत अध्ययन हुन नसकेको ध्यानाकर्षण पत्रमा उल्लेख गरिएको छ । यस्तै सिगास गाउँपालिका –१ सुँगरखालमा पनि फलाम खानीको सम्भाव्यता रहेको भएपनि अलपत्र रहेको ध्यानाकर्षण पत्रमा उल्लेख गरिएको छ ।
यस्तै बैतडीमा फस्फोराइट र डोलोमाइट चट्टानको विस्तृत अध्ययन गरेको चार बर्ष बितिसकेको भएपनि उत्खननका लागि पहल हुन नसकेको ध्यानाकर्षण पत्रमा उल्लेख गरिएको छ ।
खानी उत्खनन र उद्योग सञ्चालन गर्न सके यो क्षेत्रमा रहेको बेरोजगारी केही हदसम्म हल हुने र यो क्षेत्रको विकासमा टेवा पुग्ने भएकाले ध्यानाकर्षण पत्र पठाएको बैतडी उद्योग वाणिज्य संघका उपाध्यक्ष खीमानन्द भट्टले बताए ।
