बैतडी–कोरोनाका कारण मृत्यु भएका बैतडीका एकजना संक्रमितको शव नेपाली सेनाले व्यवस्थापन गरेको छ । डडेल्धुरा अस्पतालमा उपचारका क्रममा मंगलबार राती मृत्यु भएका दशरथचन्द नगरपालिका ९ ग्वाल्लेकका ३३ बर्षीय पुरुषको शव बैतडीमा रहेको नेपाली सेनाको हनुमानध्वज गुल्मबाट खटिएको टोलीले बुधबार अबेर साँझ व्यवस्थापन गरेको हो ।
डडेल्धुरामा शव व्यवस्थापन गर्न नदिएपछि बुधबार दिउँसो शव बैतडी ल्याइएको थियो । बुधबार नै बसेको जिल्ला कोभीड संकट व्यवस्थापन केन्द्रको बैठकले दशरथचन्द नगरपालिका ८ मौराबगरमा शव व्यवस्थापन गर्ने निर्णय गरेको थियो ।
सो ठाउँमा शव व्यवस्थापनमा स्थानीयले अवरोध गरेपछि वडा नं ८ कै डड्यौलीमा बुधबार राती शव व्यवस्थापन गरिएको हनुमानध्वज गुल्मका निमित्त गुल्मपति गिरिजा भट्टले बताए । स्थानीयहरुको अवरोधका कारण शव व्यवस्थापनमा ढिलाई भएको उनले बताए ।
कोरोनाबाट मृत्यु भएकाहरुको शव व्यवस्थापनका लागि बनाएको कार्यविधि अनुसार नै मृतकको शव व्यवस्थापन गरिएको निमित्त गुल्मपति भट्टले बताए ।
