![सुदूरपश्चिमका मुख्यमन्त्री सोडारीलाई राजीनामा दिन सुझाव](https://mail.sagunkhabar.com/uploads/posts/Sammelan-1-1720859453.jpg)
कैलाली –सुदूरपश्चिमका मुख्यमन्त्री दीर्घबहादुर सोडारीलाई पदबाट राजीनामा दिन आग्रह गरिएको छ । शनिबार संसद सचिवालयमा नेपाली कांग्रेस, नेकपा एमाले र नागरिक उन्मुक्ति पार्टीका नेताहरुले संयुक्त पत्रकार सम्मेलनको आयोजना गर्दै मुख्यमन्त्री सोडारीलाई सरकार गठन र बजेटमाथिको छलफलका लागि सहजीकरण गर्न आग्रह गरेका हुन् ।
नयाँ गठबन्धन बनेपछि मुख्यमन्त्री सोडारी अल्पमतमा परीसकेकाले राजीनामा दिएर मार्ग प्रशस्त गर्न आग्रह गरिएको नेपाली कांग्रेस संसदीय दलका नेता कमलबहादुर शाहले बताए ।
मुख्यमन्त्री सोडारीकै कारण बजेटमाथि हुन नसकेकाले तत्काल राजीनामा दिएर सरकार गठन र बजेटमाथिको छलफलका लागि सहजीकरण गर्न आग्रह गरिएको शाहले बताए ।
पत्रकार सम्मेलनमा एमाले संसदीय दलका उप–नेता सन्तोष थापा (शर्मा), प्रमुख सचेतक बीरबहादुर थापा, नागरिक उन्मुक्ति पार्टीका संसदीय दलका नेता घनश्याम चौधरी, पूर्वमन्त्री रामेश्वर चौधरी लगायतको सहभागिता थियो ।
केन्द्रमा नयाँ सत्ता गठबन्धन बनेपछि सुदूरपश्चिममा नेकपा एमालेले मुख्यमन्त्री सोडारीलाई दिएको समर्थन फिर्ता लिइसकेको छ । एमालेले समर्थन फिर्ता लिएसँगै सोडारी नेतृत्वको सरकार अल्पमतमा परेको छ ।