बैतडी– बैतडीको पाटन नगरपालिका वडा नं ४मा प्रधानमन्त्री रोजगार कार्यक्रम अन्तर्गतको झण्डै चार लाख रुपैंया हिनामिना भएको भन्दै स्थानीयहरु आन्दोलित भएका छन् । डोडरखोलादेखि स्वास्थ्यचौकी र मङरौंधारादेखि सिउडे सम्मको बाटो निर्माणमा अनियमितता भएको उनीहरुको आरोप छ ।
प्रधानमन्त्री रोजगार कार्यक्रम अन्तर्गत स्थानीयहरुलाई ७ लाख २ हजारको हाराहारी रकम वितरण गरेपनि उपभोक्ता समितिले नगरपालिकाबाट १० लाख ९७ हजार भुक्तानी लिएको छ ।
पाटन नगरपालिकाको रोजगार शाखामा कार्यरत प्राविधिक सम्राट चन्द र उपभोक्ता समिति अध्यक्ष गौरीदत्त भट्टको मिलेमतोमा रकम हिनामिना गर्न खोजिएको स्थानीय पूर्णदेव भट्टले बताए । स्थानीयहरुलाई १ हजार ३ सय हाजिरीको मात्रै भुक्तानी दिइएको छ भने नगरपालिकामा २ हजार २ सय हाजिरी पेश गरिएको उनले बताए ।
प्रधानमन्त्री रोजगार कार्यक्रम अन्तर्गत ३ लाख ९५ हजार रुपैंया हिनामिना गर्न खोजेको भन्दै स्थानीयहरुले प्रशासनमा उजुरी दिने तयारी समेत गरेका छन् ।
यता पाटन नगरपालिकाका प्रमुख केशवबहादुर चन्दले सो कार्यमा अनियमितता भएको पुष्टि भए सम्बन्धित कर्मचारीलाई कारवाही गर्ने आश्वासन दिएका छन् । सोमबार पाटन नगरपालिका ४ मा आन्दोलित स्थानीयहरुसंग छलफल गर्दै उनले अनियमितता गरेको पाइए कारवाही गर्ने आश्वासन दिएका हुन् ।
यो बिषयमा उपभोक्ता समितिका अध्यक्षलाई फोन गर्न खोज्दा फोन सम्पर्क हुन सकेको छैन् । प्रधानमन्त्री रोजगार कार्यक्रम अन्तर्गत अन्य ठाउँमा पनि रकम हिनामिना भएको हुन सक्ने स्थानीयहरुले आशंका गरेका छन् ।
