बैतडी –बैतडीको दुदिलाखान–गाँजरी सडक २० दिनपछि खुलेको छ । सिगास गाउँपालिकाको केन्द्र गर्जे जोड्ने सडक निर्माणको माग राख्दै संघर्ष समितिले सडक अवरुद्ध गरेको थियो ।
सोमबार जिल्लाको पाटनमा भएको सर्वपक्षीय छलफलले गाउँपालिकाको केन्द्र गर्जे जोड्ने सडक निर्माणको काम अघि बढाउने सहमति गरेपछि अवरुद्ध सडक खोलेको संघर्ष समितिका संयोजक पवन चन्दले जानकारी दिए ।
गाँजरी कुर्चेनेटा हुँदै गाउँपालिकाको केन्द्र जोड्ने सडक यथाशीघ्र निर्माणको माग राख्दै संघर्ष समितिले फागुन ८ देखि सडक अवरुद्ध गरेको थियो ।
पाटनमा बसेको सर्वपक्षीय बैठकमा सिगास गाउँपालिकाको केन्द्र जोड्ने सडकका लागि कुर्चेनेटा हुँदै गर्जे र गाँजरी–धौलाडी हुँदै गर्जे सडकको प्राविधिक टीमले स्थलगत अध्ययन गर्ने सहमति भएको छ । एक महिनाभित्र प्राविधिक प्रतिवेदन सार्वजनिक गर्ने र त्यसपछि सडक निर्माणको काम अघि बढाउने सहमति भएको संयोजक चन्दले बताए ।
दुवै सडकको सम्भाव्यता अध्ययनपछि सडक निर्माणको काम अघि बढाउने सहमति भएको संयोजक चन्दले बताए ।
त्यसअघि पुष२० गते भएको सहमति कार्यान्वयन नगरेको भन्दै फागुन ८ गतेदेखि सडक बन्द गरिएको थियो ।
