बैतडी –बैतडीमा ८९ हजार बढी बाख्रालाई पिपिआर विरुद्धको खोप लगाइएको छ । किसानहरुले पालेका जिल्लाभरीका ८९ हजार १ सय बाख्राहरुलाई पिपिआर विरुद्धको खोप लगाइएको भेटरेनरी अस्पताल तथा पशुसेवा विज्ञ केन्द्रका प्रमुख श्यामसिंह खड्काले बताए ।
पिपिआर रोग लाग्नबाट बचाउन खोपमात्रै उपाय भएकाले किसानहरुले पालेका बाख्राहरुलाई खोप लगाइएको खड्काले बताए । माघ र फागुनमा जिल्लाका १० ओटै स्थानीय तहमा अभियान सञ्चालन गरेर खोप लगाइएको उनले बताए ।
प्रत्येक पालिकाहरुमा निश्चित समयका लागि खोप कार्यकर्ता नियुक्त गरेर पिपिआर विरुद्धको खोप अभियान सञ्चालन गरेको भेटरेनरी अस्पताल तथा पशु सेवा विज्ञ केन्द्रका पशु विकास अधिकृत डा.विशाल पाठकले जानकारी दिए ।
दशरथचन्द नगरपालिकामा १० हजार ७ सय बाख्रालाई खोप लगाइएको छ भने पाटन नगरपालिकामा १० हजार ९ सय बाख्रालाई खोप लगाइएको छ । यस्तै पुर्चौंडीमा १० हजार बाख्रालाई खोप लगाइएको छ भने मेलौलीमा ८ हजार बाख्रालाई खोप लगाइएको छ ।
जिल्लाको सुर्नया गाउँपालिकामा १० हजार, शिवनाथ गाउँपालिकामा ४ हजार, डिलाशैनीमा ९ हजार, सिगासमा १० हजार ५ सय, दोगडाकेदारमा ८ हजार र पञ्चेश्वर गाउँपालिकामा ८ हजार बाख्रालाई खोप लगाइएको डा. पाठकले बताए ।
बैतडीमा बाख्राको संख्या १ लाख ३२ हजार रहेकोमा ८९ हजार १ सय बाख्रालाई खोप लगाइएको छ । उपलब्ध खोपको मात्रा अनुसार बाख्राहरुलाई खोप लगाइएको हो ।
पिपिआर रोग लागेमा त्यसको औषधि नहुने र त्यो रोगबाट बचाउने एकमात्र उपाय खोप भएकाले पिपिआर विरुद्धको खोप अभियान सञ्चालन गरिएको कार्यालय प्रमुख खड्काले जानकारी दिए । उनले भने, ‘बाख्रामा पिपिआर रोग लागेमा ८० प्रतिशत मर्ने सम्भावना हुन्छ । त्यसैले किसानहरुले पालेका बाख्रामा क्षति नहोस भनेर पिपिआर खोप लगाएका हौं ।’
बाख्रामा पिपिआर रोग लागेमा पखाला लाग्ने, र्याल सिगान बगाउने, उच्च ज्वरो आउनेलगायत लक्षण देखा पर्ने र अन्त्यमा बाख्रा मर्ने गर्दछन् ।
