![बैतडीको सुर्नयाका भूमीहिनहरुलाई निवेदन दिन आह्वान](https://mail.sagunkhabar.com/uploads/posts/Bhumi aayog 11660805900.jpg)
बैतडी–राष्ट्रिय भूमी आयोगले बैतडीको सुर्नया गाउँपालिकाका भूमीहिनहरुलाई निवेदन दिन आह्वान गरेको छ । आयोगले बिहीबार एक सूचना प्रकाशन गर्दै ३५ दिनभित्र तोकेको ढाँचामा निवेदन दिन आग्रह गरेको हो ।
भूमीहिन दलित, भूमीहिन सुकुम्बासी र अव्यवस्थित बसोबासीलाई जग्गा प्राप्तिका लागि निवेदन दिन आग्रह गरिएको हो । यो भन्दा पहिला पनि आयोगले सूचना प्रकाशन गरिसकेको भएपनि सुर्नयामा लगत संकलनको काम नसकिएकाले फेरि सूचना प्रकाशन गरिएको राष्ट्रिय भूमी आयोग जिल्ला समिति बैतडीका अध्यक्ष धर्मसिंह ऐर(कपील)ले जानकारी दिए ।
राष्ट्रिय भूमी आयोगले भूमीहिन दलित, भूमीहिन सुकुम्बासी र अव्यवस्थित बसोबासीहरुको तथ्यांक संकलन गरेर उनीहरुलाई जमीन उपलब्ध गराउने भएकाले तोकिएको समयमा पालिकाले तोकेको स्थानमा निवेदन दिन आग्रह गरिएको ऐरले बताए ।
बैतडीमा पञ्चेश्वर गाउँपालिका र शिवनाथ गाउँपालिकाले तथ्यांक संकलनको काम गरिसकेको छ । ती पालिकाहरुमा अमीन पठाएर अब जग्गाको नापजाँच गर्ने कार्य अघि बढ्ने अध्यक्ष ऐरले बताए ।
जिल्लाको दोगडाकेदार र डिलाशैनी गाउँपालिकामा पनि दोश्रो पटक सूचना प्रकाशन भएर तथ्यांक संकलनको काम भइरहेको छ । मेलौली नगरपालिकाले फेरि समय मागेले पुनः सूचना प्रकाशन हुने ऐरले बताए ।
अन्य पालिकाहरुमा भूमीहिन दलित, भूमीहिन सुकुम्बासी र अव्यवस्थित बसोबासीको तथ्यांक संकलनको काम भइरहेको अध्यक्ष ऐरले बताए । जिल्लाभरी २ हजार २ सय भन्दा बढी परिवार सुकुम्बासी रहेका हुन सक्ने अनुमान गरिएको छ ।