बैतडी –प्रदेश गौरवको योजनाको रुपमा रहेको बैतडीको सतबाँझ–श्रीभावर–हाट–दार्चुला सडक अन्तर्गत ट्रयाक खोल्न बाँकी रहेको ठाउँमा ट्रयाक खोल्ने कार्य शुरु भएको छ ।
सुर्नया गाउँपालिका वडा नं ७ र ८ को बीचमा झण्डै साढे तीन किलोमिटर ट्रयाक खोल्ने बाँकी रहेकाले उक्त खण्डमा ट्रयाक खोल्ने काम आजदेखि शुरु भएको सुर्नया गाउँपालिकाका अध्यक्ष अम्मरबहादुर कुँवरले बताए । आज कार्यक्रमकाबीच ट्रयाक खोल्ने कार्यको उद्दघाटन समेत गरिएको छ ।
सुर्नया गाउँपालिकाको कठमडादेखि ट्रयाक खोल्ने कार्यको शुरुवात गरिएको हो । सतबाँझ–श्रीभावर–हाट–दार्चुला सडकमा सुर्नया गाउँपालिकाको कठेगौंडादेखि थप २० किलोमिटर स्तरोन्नतीका लागि ठेक्का सम्झौता भएर काम शुरु भएको पूर्वाधार विकास कार्यालय बैतडीले जनाएको छ । जागृति टक्सार मुनाल जेभीसँग १४ करोड ७६ लाखमा स्तरोन्नती कार्यका लागि ठेक्का सम्झौता भएको र सोही ठेक्का अन्तर्गत नयाँ ट्रयाक खोल्ने कार्य शुरु भएको पूर्वाधार विकास कार्यालयका इन्जिनियर नरेश भुलले बताए ।
सडक स्तरोन्नती कार्य अन्तर्गत नयाँ ट्रयाक खोल्ने कामलाई प्राथमिकता राख्न निर्माण कम्पनीलाई भनेपछि निर्माण कम्पनीले नयाँ ट्रयाक खोल्ने कार्य शुरु गरेको इन्जिनियर भुलले बताए । उनले भने ‘हामीले स्तरोन्नती गर्ने कार्य अन्तर्गत नयाँ ट्रयाक खोल्ने कार्यलाई प्राथमिकतामा राख्न निर्माण कम्पनीलाई आग्रह गरेका थियौं । सोही अनुसार काम अघि बढेको छ ।’
२०८२ पौष महिनाभित्र स्तरोन्नतीको काम सक्ने गरेर निर्माण कम्पनीसँग सम्झौता भएको इन्जिनियर भुलले बताए ।
सतबाँझ–श्रीभावर सडकको स्तरोन्नती कार्य अन्तर्गत ट्रयाक खोल्न बाँकी रहेको ठाउँमा ट्रयाक खोल्ने काम शुरु भएपछि पालिकाको वडा नं ७ र ८ का नागरिकलाई सहज हुने पालिका अध्यक्ष कुँवरले बताए । यो सडक आर्थिक हिसाबले समेत महत्वपूर्ण रहेको भन्दै आफूहरुले पनि स्तरोन्नती कार्य अन्तर्गत नयाँ ट्रयाक खोल्ने कार्यलाई प्राथमिकता राख्न आग्रह गरेको र सोही बमोजीम काम शुरु भएको उनले बताए । उनले भने ‘सतबाँझ–श्रीभावर सडक सुर्नयाको मात्रै नभएर अन्य पालिकाहरुका लागि पनि महत्वपूर्ण छ । सुर्नयाका लागि यो लाइफलाइन हो । त्यसैले यो सडक स्तरोन्नतीका कामलाई समयमै सक्न हामीले पालिकाका तर्फबाट गर्ने सबै पहल गर्छौं ।’
सतबाँझ–श्रीभावर सडकमा स्तरोन्नती कार्य शुरु भएपछि यहाँका नागरिकलाई फाइदा हुने सुर्नया गाउँपालिका वडा नं ६ का वडा अध्यक्ष मदनराज अवस्थीले बताए । ट्रयाक खोल्ने काम सकिएमा पालिकाका सबै नागरिकको सडकमा पहुँच पुग्ने उनले बताए ।
सतबाँझ –श्रीभाव–हाट–दार्चुला सडक अन्तर्गत १४ किलोमिटर कालापत्रेका लागि समेत ठेक्का भएर काम अघि बढीसकेको पूर्वाधार विकास कार्यालय बैतडीका इन्जिनियर नरेश भुलले बताए । सतबाँझ जिरोप्वाइन्टदेखि ६ किलोमिटर कालोपत्रे गर्ने कार्य अन्तिम चरणमा रहेको छ । ६ किलोमिटर अगाडिदेखि थप १४ किलोमिटर कालोपत्रेका लागि निर्माण कम्पनीले काम शुरु गरिसकेको भुलले बताए ।
सिद्धबाबा निर्माण सेवाले कालोपत्रेका लागि सर्वेको काम शुरु गरिसकेको छ । आगामी ३६ महिनाभित्र काम गरिसक्ने लक्ष्यसहित ४८ करोडको हाराहारीमा ठेक्का सम्झौता भएको बताइएको छ ।
