बैतडी –सुदूरपश्चिमको मौलिक पर्वको रुपमा रहेको गौरापर्व कहिले मनाउने भन्ने बिषयमा विवाद रहेका बेला क्वाँइतोला जोशी समाज कञ्चनपुरले भदौ २१ गते गौरा मनाउने निर्णय गरेको छ । 

क्वाँइतोला जोशी समाज कञ्चनपुरको आज बसेको बैठकले भदौ २१ गते नै गौरापर्वको उपयुक्त तिथी भएकाले २१ गते नै गौरा मनाउने निर्णय भएको समाजका सचिव रामदत्त जोशीले बताए । 

डिलाशैनी गाउँपालिका ७ खेतागाउँ मूलघर भएका क्वाँइतोला जोशी परिवारले विगतको परम्परा र शास्त्रीय मान्यता तथा स्थानीय देवीदेवताको आस्था अनुसार भदौ २१ गते गौरा मनाउने निर्णय गरेको हो । 

गौरा एकादशी र जनै पूर्णिमाको ब्रत अघि गौरा पर्व नहुने भएकाले आफूहरुले भदौ २१ गते गौरा मनाउने जोशीले बताए । बिरुडा पञ्चमीदेखि गौरा पर्व शुरु भइसक्ने र पश्चिमी क्षेत्रमा अगस्ती उदय भदौ २१ गते पछि नै हुने भएकाले सोही दिन गौरा मनाउने निर्णय भएको उनले बताए । 

नेपाल पञ्चांग निर्णायक समितिले भदौ ७ गते गौराको तिथिमिति दिएपछि अहिले निकै बहस भइरहेको छ । भदौ ७ गतेको गौरा श्रावण शुक्ल पक्षमा परेको छ । अगस्ती उदयको प्रभाव हुने भएकाले भदौ ७ गते नै गौराको उपयुक्त तिथी भएको कतिपय ज्योतिषहरुको दाबी छ ।