बैतडी –बैतडीमा एक बर्षको अवधिमा ४ सय २७ साना तथा मझौला उद्योग दर्ता भएका छन् । घरेलु तथा साना उद्योग कार्यालय बैतडीका अनुसार गत आर्थिक बर्षमा ४ सय २७ उद्योग दर्ता भएका हुन् । 

कृषि, वन, आटामिल, मसला, अचार लगायतका उद्योगहरु दर्ता भएका घरेलु तथा साना उद्योग कार्यालयका सूचना अधिकारी लक्ष्मणकुमार साउँदले बताए ।  

यस्तै वाणिज्यतर्फ १६३ पसलहरु दर्ता भएका छन् । जिल्लाभरी अहिले सम्म साना र मझौला गरेर ४ हजार १४ उद्योग रहेका सूचना अधिकारी साउँदले बताए । घरेलु तथा साना उद्योग कार्यालयमा दर्ता भएका उद्योगहरु नवीकरण पनि हुने गरेका छन् । दर्ता भएका सबै नभएपनि केही उद्योगहरु भने सञ्चालनमा रहेका बताइएको छ । यस्तै वाणिज्यतर्फ जिल्लाभरी ३ हजार २०६ फर्म दर्ता रहेका सूचना अधिकारी साउँदले बताए ।  

जिल्लामा दर्ता भएका उद्योगहरुबाट १ हजार ५१ जनाले प्रत्यक्ष रोजगारी पाएको घरेलु तथा साना उद्योग कार्यालयका प्रमुख अम्बादत्त जोशीले बताए । उद्योगीहरुको क्षमता अभिवृद्धिका लागि कार्यालयले उद्यमी तालिमहरु समेत प्रदान गर्दै आएको छ । 

घरेलु तथा साना उद्योग कार्यालयले आर्थिक बर्ष २०७५÷७६ देखि आर्थिक बर्ष २०७९÷८० सम्म १ हजार ३१५ जना उद्यमीलाई तालिम दिएको जनाएको छ । 

गत आर्थिक बर्षमा कार्यालयले १५ लाख २२ हजार १२५ रुपैंया राजस्व संकलन गरेको जनाइएको छ ।