बैतडी –बैतडीको सुर्नया गाउँपालिका भित्रको तडीगाउँ –कुर्कुट्या–रुइनीघाट जोड्ने सडक खण्डको सर्वे गरिएको छ । शनिबार सडक खण्डको सर्वे गरिएको हो ।
गाउँपालिकाको वडा नं ३ तडीगाउँ खलापरीदेखि वडानं २ को कुर्कुट्या हुँदै रुइनीघाट सम्मको सडकको निरीक्षण तथा सर्वे कार्य गरिएको सुर्नया गाउँपालिकाका अध्यक्ष अम्मरबहादुर कुँवरले बताए ।
शहरी विकास तथा भवन निर्माण कार्यालयमार्फत सडक सर्वे कार्य गरिएको अध्यक्ष कुँवरले बताए । स्थानीयहरुको उपस्थितिमा सडक सर्वे गरिएको र यो महिनाको मसान्त सम्म बोलपत्र आह्वान गरि सडक निर्माण कार्य सुचारु गरिने अध्यक्ष कुँवरले बताए ।
विवाद रहित वाातावरणमा सडक निर्माण कार्यलाई अघि बढाउन सडक सर्वे गरिएको सुर्नया गाउँपालिका वडा नं २ का वडा अध्यक्ष गणेशबहादुर बिष्टले बताए ।
यो सडक निर्माण भएमा सुर्नया गाउँपालिका वडा नं ३ का बिजुल, वडा नं २ को कुर्कुट्या लगायतका नागरिकलाई समेत सहज हुने स्थानीयबासिन्दा समेत रहेका राप्रपाका नेता देवबहादुर चन्दले बताए ।
डोडेश्वर मन्दिर सम्म जोड्ने हिसाबले निर्माण गरिने सडकका लागि अहिले १ करोड बजेट विनियोजन भइसकेको गाउँपालिका अध्यक्ष कुँवरले बताए ।
