बैतडी- बैतडीको पञ्चेश्वरमा महिलाहरुलाई सिलाई कटाई तालिम दिन थालिएको छ। गाउँपालिकाको वडा नं १ मा महिलाहरुलाई सिलाई कटाई तालिम दिन थालिएको हो ।
महिलाहरुलाई आत्मनिर्भर बनाउने धेयले तालिम सञ्चालन गरिएको वडा अध्यक्ष दिवान सार्कीले जानकारी दिए । वडाको बजेटबाट सिलाई कटाई तालिम सञ्चालन गरिएको उनले बताए ।
गाउँसमाजमा पछाडि परेका महिलाहरुलाई सीप सिकाएर आत्मनिर्भर बनाउन आफुले सिलाई कटाई तालिमको अवधारणा अघि सारेको वडा अध्यक्ष सार्कीले बताए । ९ गते देखि सञ्चालन भएको तालिममा ३० जना महिलाहरुको सहभागिता रहेको बताइएको छ ।
एक सय २० दिन चल्ने तालिममा महिलाहरुलाई कपडा सिउने कला सिकाइदै छ । सिलाई कटाई पछि कुनै महिलाहरुले व्यवसायिक रुपले काम गर्न चाहे वडाले सहयोग गर्ने वडा अध्यक्ष सार्कीको भनाई छ ।
सिलाई कटाई तालिमले घरको चुलो चौकोमा सिमित रहेका महिलाहरुलाई व्यवसाय नै सञ्चालन गरी आर्थिक रुपमा सबल र सक्षम बनाउन महत्वपूर्ण टेवा पुग्ने विश्वास गरिएको छ ।
