बैतडी- बैतडीमा झण्डै ४ हजार सवारीसाधन कारबाहीमा परेका छन् । जिल्लामा ट्राफिक नियम उल्लंघन गर्ने ३ हजार ९ सय ९ वटा सावरीसाधन कारवाहीमा परेका हुन् ।
आर्थिक वर्ष २०७९÷८० मा ट्राफिक नियम उल्लंघन गर्ने ३ हजार ९ सय ९ वटा सावारीसाधनलाई कारबाही गरिएको जिल्ला ट्राफिक कार्यालय बैतडीका प्रमुख तेज बहादुर रावलले जानकारी दिए ।
ट्राफिक नियमको उल्लङ्घन गर्ने जिप, मोटरसाइकल, ट्याक्टर, टिप्पर, बस, ट्रक लगायतका सवारीसाधन कारबाहीमा परेका उनले बताए । सवारीसाधानहरु मध्ये पनि सबै भन्दा बढी जिप कारबाहीमा परेका बताइएको छ ।
यस्तै कारबाहीमा परेका सवारीसाधनबाट २१ लाख २३ हजार ५ सय राजस्व संकलन गरिएको ट्राफिक कार्यालय बैतडीका प्रमुख रावलले बताए । क्षमता भन्दा बढी यात्रु बोक्ने, बिना हेलमेट मोटरसाइकल चलाउने, तीव्र गतिमा सवारी साधन हाँक्ने लगायतका ट्राफिक नियम उल्लंघन गर्ने सवारी साधन कारवाहीमा उनले बताए ।
ट्राफिक नियम उल्लंघन गर्नेहरुबाट जरीवाना असुल गर्नुका साथै उनीहरुलाई ट्राफिक नियमका बारेमा सम्झाईबुझाई गर्ने गरिएको जिल्ला ट्राफिक प्रहरी कार्यालयले जनाएको छ ।
