बैतडी- बैतडीमा वर्षादका बेला ग्रामीण सडकहरु अवरुद्ध हुने गरेका छन् । पहिरोले सकड अवरुद्ध हुने गरेका भएपनि यहाँका स्थानीय सरकारले पन्छाउने काममा चासो दिने गरेका छैनन् ।
सडक सञ्चालनमा स्थानीय सरकारले चासो नदिएपछि अहिले स्थानीय नागरिकहरु आफै पहिरो पन्छाएर सडक सुचारु गर्न थालेका छन् । जिल्लाको पाटन नगरपालिका १० का जनता एकजुट भएर सडकमा खसेको पहिरो हटाउन थालेका हुन् ।
स्थानीय सरकार तथा वडा कार्यालयले चासो नदिएपछि आफै मिलेर सडक सुचारुमा जुटेका स्थानीय सुरेन्द्र महराले बताए । वडा नम्बर १० को केन्द्र हतासदेखी उकाली डैशीली जाने कृषि सडक पहिरोले अवरुद्ध थियो । लगातारको वर्षादले अवरुद्ध सडक खुलाउन स्थानीय निकाय तथा जनप्रतिनिधिबाट पहल नभएको स्थानीयहरुको आरोप छ ।
पहिरोले अवरुद्ध सडक सुचारु नभएपछि आफै सफाइमा जुटेका स्थानीय महराले बताए । उत्पादित तरकारी बारीमै कुहिन थालेकाले आफै सडक सुचारुमा लागेका स्थानीयहरुको भनाई छ । स्थानीय सरकारले जनताका समस्याहरुलाई नजरअन्दाज गर्ने गरेको नागरिकहरुको आरोप छ । जिल्लाका अन्य ठाउँमा पनि सडक अवरुद्ध छन् ।
अवरुद्ध सडक तत्काल सुचारु गर्ने तर्फ यहाँका जनप्रतिनिधिहरुमा चासो छैन् । जसका कारण नागरिकहरुले बेलाबखत समस्या झेल्दै आएका छन् ।
