बैतडी –बैतडीमा वृक्षारोपण दिवसको अवसरमा विभिन्न जातका बिरुवाहरु रोपिएका छन् । दशरथचन्द नगरपालिका वडा नं ४ कठपतेमा वृक्षारोपण गरिएको डिभिजन वन कार्यालयका प्रमुख भीमप्रसाद कँडेलले जानकारी दिए ।
डिभिजन वन कार्यालयको आयोजना र नेपाली सेनाको हनुमानध्वज गुल्मको समन्वयमा वृक्षरोपण कार्यक्रम गरिएको हो । नेपाली सेनाको तालिम गर्ने स्थल कठपतेमा वृक्षारोपण गरिएको कँडेलले बताए ।
कल्की फूल, दालचिनी र टिमुरका गरेर करीब डेढसय बिरुवा रोपण गरिएको डिभिजन वन प्रमुख कँडेलले बताए । ‘सन्ततीका लागि सोचौं, समृद्धि र हरियालीका लागि रुख रोपौं’भन्ने नाराका साथ छैटौं राष्ट्रिय वृक्षारोपण दिवस मनाइएको हो ।
वृक्षारोपण कार्यक्रमममा प्रमुख जिल्ला अधिकारी सुरेश पन्थी, नेपाली सेनाको हनुमानध्वज गुल्मका गुल्मपति, नेपाल प्रहरी, सशस्त्र प्रहरी,जनप्रतिनिधि र स्थानीय नागरिकको सहभागिता रहेको थियो ।
बैतडीमा कुल क्षेत्रफलको ६२ प्रतिशत वन क्षेत्र रहेको भएपनि उत्पादनमूलक वन नहुँदा खासै लाभ लिन नसकिएको डिभिजन वन कार्यालयका प्रमुख कँडेलले बताए । वनबाट आम्दानी गर्ने हिसाबले वन व्यवस्थापनमा सामुदायिक वनहरु समेत लाग्न नसकेका उनको भनाइ छ ।
