बैतडी- आर्थिक वर्षको अन्तिम महिनामा अहिले स्थानीय सरकारहरु बजेट सिद्धाउन लागि परेका छन् । बैतडीका स्थानीयतहरु पनि असारको महिनामा थरिथरिका कार्यक्रम आयोजना गरेर बजेट सिद्धाउदै छन ।
स्थानीयतहमा अहिले तालिमका अनेक नाम दिएर बजेट सक्ने काम भैरहेका हुन् । कुनै ठाउँमा दुइ दिने छन त कुनै कुनै ठाउँमा एक दिने तालिम आयोजना भएका छन् । उपलब्धिहिन तालिम सञ्चालन गरेर बजेट सक्ने काम भैरहेको स्थानीय युवाहरुले बताए ।
लक्षित वर्गहरुका लागि तालिम भनेर बजेट विनियोजन हुने र मासुभात खाएर बजेट सक्ने काम भैरहेको स्थानीय प्रकाश भट्टले बताए । कतै खेलकुद सम्बन्धिका त कतै अपाँगता सम्बन्धिका तालिम आयोजना भएका छन । कुनै ठाउँमा जनचेतना मुलक कार्यक्रम आयोजन गरिएका छन् भने क्षमता अभिवृद्धि, अन्तरक्रिय र अभिमुखिकरणका नामा पनि अहिले बजेट सिद्धाउने काम भैरहेको हो ।
सो कार्यक्रमहरुमा पालिकाका सबै जनप्रतिनिधि र कर्मचारी भत्ता पचाउनमा लागि परेका बताइएको छ । सीप विकासका तालिम भनेर बैतडीमा प्रत्येक वर्ष ठुलो बजेट खर्च हुँदै आएको छ । तर ती तालिमको पनि अपेक्षीत नतिजा भने अहिले सम्म नदेखिएको स्थानी युवाहरुले बताए । स्थानीय तहहरुले सञ्चालन गरेका सिलाईकटाई हातेहोजियारि,लगायतका सीप विकास तालिम पनि भत्ता र खाजामा सिमित हुने गरेका छन् ।
यती मात्रै नभएर असारमै योजना सम्झौत गर्ने र अहिले नै कार्यान्वन गर्ने काम पनि स्थानीय तहमा भैरहेका छन् । असारे प्रवृत्ति अझै हट्न सकेको छैन् । अरु समय मौन बसेका स्थानीयतह अहिले असारको महिना बजेट सिद्धाउन लागि परेका हुन् । स्थानीयतहको असारे प्रवृत्तिले दिगो र प्रभावकारी काम हुृने गरेको छैन् ।
