बैतडी, कर्णाली प्रदेशमा आयोजना हुन गइरहेको दशौँ बृहत् राष्ट्रिय खेलकुद प्रतियोगिताको पूर्वतयारी स्वरूप बैतडीमा खेलाडी दर्ता फारम भर्ने प्रक्रिया सुरु भएको छ ।
बैतडी जिल्ला खेलकुद समितिका अनुसार प्रदेशस्तरीय तथा जिल्लास्तरीय छनौट प्रतियोगितामा सहभागिताका लागि जिल्लाभित्र खेलिने विभिन्न खेलका महिला तथा पुरुष खेलाडीहरूले असोज २८ गतेभित्र फारम भरिसक्नुपर्नेछ ।
फारम भर्नका लागि इच्छुक खेलाडीहरूले असोज १४ गते (बुधबार) देखि २८ गतेसम्म बिहान दश बजेदेखि बेलुका पाँच बजेभित्र दशरथचन्द नगरपालिका–४ गडी स्थित जिल्ला खेलकुद समितिको कार्यालयमा पुगेर आवेदन दिन सक्नेछन् ।
आवेदनका लागि नागरिकता वा जन्मदर्ताको प्रतिलिपि र पासपोर्ट साइजको फोटो अनिवार्य गरिएको छ । दर्ता फारम नभर्ने र नाम दर्ता नगराएका खेलाडीहरूलाई जिल्लास्तरीय छनौट प्रतियोगितामा सहभागी नगराइने जिल्ला खेलकुद समिति बैतडीले जनाएको छ ।
