बैतडी –सडकमाथिबाट पहिरो खसेपछि अवरुद्ध बनेको महाकाली लोकमार्ग सुचारु भएको छ । 

लोकमार्गको सतबाँझ–गोकुलेश्वर सडकखण्ड अन्तर्गत बैतडीको दोगडारकेदार गाउँपालिका–५ सलसेनामा मंगलबार बिहान सवा ९ बजे पहिरो खसेको थियो । उक्त पहिरो पन्छ्याएपछि मंगलबार राति ८ बजेदेखि सडक सुचारु भएको जिल्ला प्रहरी कार्यालय बैतडीका प्रवक्ता, प्रहरी निरीक्षक बलराम पाण्डेयले जानकारी दिए । 

सडक सुचारु भएसँगै बीचबाटोमा रोकिएका सवारी साधन गन्तव्यतर्फ गएका बताइएको छ । उक्त क्षेत्रमा पहिरोको जोखिम भने कायम रहेको छ । 

सलसेना क्षेत्रमा खसेको पहिरो पन्छ्याउन ११ घण्टा लागेको थियो ।