बैतडी –बैतडीको मेलौली नगरपालिकामा गरिएको तालाबन्दी खुलेपछि कार्यालयको कामकाज सुचारु भएको छ ।  

गएको बिहीबार गरिएको तालाबन्दी आइतबार दिउँसो खुलेको नगरपालिकाका प्रमुख प्रशासकीय अधिकृत नारायणबहादुर चन्दले जानकारी दिए । तालाबन्दी गर्ने पक्षले उठाएका मागहरु सम्बोधन गर्ने प्रतिबद्धतापछि तालाबन्दी खोलिएको हो । 

नगर प्रमुख अहिले घरमै रहेका र तालाबन्दी गर्ने पक्षसँग फोनमार्फत कुराकानी गरेर तालाबन्दी खोलिएको प्रमुख प्रशासकीय अधिकृत चन्दले बताए । नगर प्रमुख भीमबहादुर चन्द नगरपालिकामा आएपछि छलफल गरिने बताइएको छ । 

गत बिहीबार विभिन्न मागहरु राख्दै जेनजी, जेन एक्स, जेन वाइ, नागरिक समाज लगायतले नगरपालिकामा तालाबन्दी गरेको थियो । 

नगरपालिकामा भ्रष्टचार,बेथिती,अनियमितता बढेको भन्दै उनीहरुले तालाबन्दी गरेका थिए ।