बैतडी –शहीद दिवसको अवसरमा शहीद दशरथ चन्दको जन्मभूमी बैतडीमा साहित्य महोत्सव तथा अन्तर्राष्ट्रिय काव्य गोष्ठी सञ्चालन गरिएको छ । 

राष्ट्रियता संरक्षण अभियानको आयोजना, शहीद दशरथ चन्द प्रतिष्ठानको बिशेष सहयोग र दशरथचन्द नगरपालिकाको प्रर्वद्धनमा दशरथचन्द साहित्य महोत्सव तथा अन्तर्राष्ट्रिय काव्य गोष्ठी सञ्चालन गरिएको हो । 

शहीद दशरथ चन्दको जन्मघर बस्कोटमा महोत्सव सञ्चालन गरिएको राष्ट्रियता संरक्षण अभियानका संयोजक हेमबाबु लेखकले जानकारी दिए । शहीद चन्दको बारेमा आम नागरिकलाई जानकारी दिने उद्देश्यले महोत्सवको आयोजना गरिएको हो । 

उक्त महोत्सवमा नेपाल ललितकला प्रज्ञा प्रतिष्ठानका कुलपति नारदमणी हार्तम्छालीको समेत सहभागिता रहेको छ । दशरथचन्द साहित्य महोत्सव तथा अन्तर्राष्ट्रिय काव्य गोष्ठीमा नेपाल तथा भारतका साहित्यकारहरुको सहभागिता रहेको छ । 

शहीद दशरथ चन्दको शालिकमा माल्यार्पण गर्दै शुरु भएको गोष्ठी शहीद दशरथचन्द स्मृति प्रतिष्ठानका अध्यक्ष विनोदबहादुर चन्दको अध्यक्षतामा सञ्चालन भएको हो । उक्त महोत्सवमा कुलपचि हार्तम्छाली प्रमुख अतिथी रहेका थिए । 

दशरथचन्द साहित्य महोत्सवको पहिलो दिन आज सुदूरपश्चिमको संस्कृति झल्काउने छलिया नृत्य तथा भडाहा प्रस्तुत गरिएको थियो । 

यस्तै भारतका प्रख्यात कथक नृत्यकार डा. विणा शर्माले कथक नृत्य प्रस्तुत गरेकी छन् भने यो क्षेत्रमा गाइने सगुन –फाग समेत प्रस्तुत गरिएको राष्ट्रियता संरक्षण अभियानका सदस्य कविराज भट्टले जानकारी दिए । यस्तै कुमाउनी गायिका भगवती दनुपुरियाले प्रसिद्ध गगनाथको जागरण प्रस्तुत गरेकी थिइन् । 

यस्तै शहीदका सपना कति पूरा कति अपूरा शीर्षकमा सञ्चालन भएको बहसमा डा. टेकराज पन्त, प्राध्यापक डा. मुकुन्दप्रसाद कलौनी, बरिष्ठ पत्रकार धमेन्द्र झा, साहित्यकार देवी दुलालले वक्ताको रुपमा सहभागिता जनाएका थिए । उक्त बहस पत्रकार महादेव अवस्थीले सहजीकरण गरेका थिए । 

यस्तै मानसखण्डको सांस्कृतिक विरासत शीर्षकमा सञ्चालन भएको बहसमा उपप्राध्यापक पञ्चमराज भट्ट,श्यामसुन्दर ढकाल, गणेशदत्त लेखक र साहित्यकार कर्ण दयालले वक्ता रुपमा सहभागिता जनाएको छ । उक्त बहस साहित्यकार कविराज भट्टले सहजीकरण गरेका थिए । 

यस्तै सुदूरपश्चिमका नारी श्रष्टा शीर्षकमा सञ्चालन भएको बहसमा नारा जोशी, हेमन्ती जोशी,श्रेष्ठ प्रिया पत्थर, डा. नारायणी भट्ट र चन्द्रकला पन्तले वक्ता रुपमा भाग लिइन् । उक्त बहस साहित्यकार रमेश पन्त ‘मितबन्धु’ले सञ्चालन गरे । 

दशरथचन्द साहित्य महोत्सव तथा अन्तर्राष्ट्रिय काव्य गोष्ठीमा बल्देव अवस्थी(पुर्चौडो)को अस्तित्व कविता संग्रह र खिमानन्द बडूको ‘पचपन्नमा पचपन्न’डोटेली कविता संग्रह विमोचन गरिएको छ । 

महोत्सव अन्तर्गत आज राति नेपाल र भारतका साहित्यकारहरुको सहभागितामा काव्य गोष्ठी सञ्चालन हुने भट्टले बताए ।