बैतडी–बैतडीको पाटन नगरपालिका–३ स्थित प्रसिद्ध वनारसी धाम विश्वनाथ ज्योतिर्लिङ्गमा महारुद्राभिषेक पूजा सम्पन्न भएको छ । २७ जना ब्राह्मणहरुद्वारा सामूहिक रुपमा मंगलबार महारुद्राभिषेक पूजा गरिएको ज्योतिष पण्डित गणेशदत्त पन्तले बताए ।
श्री वनारसी धाम विश्वनाथ सेवा समाजको आयोजनामा महारुद्राभिषेक पूजाको आयोजना गरिएको हो ।
मंगलबार सम्पन्न भएको महारुद्राभिषेक पूजामा पाटन नगरपालिकाका उपप्रमुख कमलसिंह बोहरा, वडा नं ३ का वडा अध्यक्ष करुणाकर भट्ट, वडा नं ४ का वडा अध्यक्ष दिपकसिंह बिष्ट लगायतको उपस्थिती रहेको थियो । यस्तै मन्दिरमा आएका श्रद्धालुहरुले मंगलबार साँझ देवीदेवताको गाथामा आधारित ठाडो खेल समेत प्रस्तुत गरेका थिए ।
वनारसी धामको महिमाका बारेमा स्कन्द महापूराणको मानसखण्डमा उल्लेख गरिनुका साथै सूर्य पूराण र साम्व पूराणमा समेत यसको महिमाका बारेमा वर्णन गरिएको पण्डित पन्तले बताए ।
भगवान शिवका १२ ज्योतिर्लिङ्गमध्येको विश्वनाथ ज्योतिर्लिङ्ग वनारसी धाममै रहेको पन्तले बताए । पौराणिक सरयु नदी अर्थात सुर्नया नदीको किनारमा अवस्थित वनारसी धाम नै विश्वनाथ ज्योतिर्लिङ्ग भएको नेपालका प्रथम ऐतिहासिक जगद्गुरु बालसन्त मोहनशरण देवाचार्यले समेत बताएका छन् ।
वनारसी धाममा विश्वनाथ ज्योतिर्लिङ्गको स्थापना गरेर पूजाआजा गर्ने गरिएको छ । श्रावणको महिना धामहरुमा पूजापाठ गर्ने चलन रही आएकाले वनारसी विश्वनाथ धाममा महारुद्राभिषेक पूजा गरिएको समाजका अध्यक्ष उत्तरबहादुर चन्दले बताए ।
वनारसी धाममा माघ शुक्ल दशमी अर्थात शैल्य दशमीका दिन ठूलो जात्रा लाग्ने गर्दछ । यो जात्रामा हजारौं दर्शनार्थी पुग्ने गरेका छन् ।यस्तै वनारसी धाममा साउनको महिना दर्शन गर्नेहरु पुग्ने गरेका छन् भने गंगादशहरा र अक्षय तृतीयका दिन समेत पूजाआजा गर्ने चलन रही आएको छ ।
यस्तै चैत शुक्ल पक्षमा वनारसी विश्वानाथ धाममा कोटी होमको आयोजना गर्ने गरिएको पण्डित पन्तले बताए ।
परापूर्वकालमा खपरे नामक दैत्यको बध गरेकाले वनारसी देवतालाई स्थानीयहरुले शक्तिशाली देवताको रुपमा पूजाआजा गर्दै आएका छन् । स्थानीयहरुले वनारसी धामलाई बाइसतालको नामले समेत पुकार्ने गरेका छन् ।
