बैतडी–बैतडीको प्रसिद्ध त्रिपुरासुन्दरी भगवती मन्दिरको दर्शनका लागि आएका दर्शनार्थीहरुलाई निशुल्क चियाको व्यवस्था गरिएको छ । जात्राको अवसरमा दर्शनका लागि आएका दर्शनार्थीहरुलाई त्रिपुरासुन्दरी मन्दिर सेवा समितिका तर्फबाट निशुल्क चियाको व्यवस्था गरिएको हो ।
दर्शनार्थीहरुको सहजताका लागि निशुल्क रुपमा शुद्ध चिया खुवाउने कार्यक्रम तय भएको र सोही अनुसार दर्शनार्थीहरुलाई चिया उपलब्ध गराउने गरिएको त्रिपुरासुन्दरी मन्दिर सेवा समितिका अध्यक्ष गणेशसिंह थापाले बताए ।
दर्शनका लागि आएकाहरुले होटेल तथा अन्य ठाउँमा चियापान नगर्ने भएकाले उनीहरुको सहजताका लागि मन्दिर सेवा समितिका तर्फबाट निशुल्क चियाको व्यवस्थापन गरिएको हो ।
यस्तै दर्शनार्थीहरुको सहजताका लागि बास बस्न त्रिपालको समेत व्यवस्था गरिएको थियो । चिसोबाट बच्नका लागि हिजो राति पालको व्यवस्थापन गरिएको थापाले बताए ।
त्रिपुरासुन्दरी भगवतीको दर्शनका लागि हजारौं दर्शनार्थीहरु मन्दिरमा पुगेका छन् । मन्दिरमा हिजोदेखि शुरु भएको जात्रा आज राँगाको बलिसहित सकिनेछ ।
त्रिपुरासुन्दरीको दर्शनका लागि नेपालका मात्रै नभएर सीमावर्ती भारतीय दर्शनार्थीहरु समेत पुगेका छन् । त्रिपुरासुन्दरीको दर्शन गरेमा मनोकामना पूर्ण हुने जनविश्वास रही आएको छ ।
